Владимир Путин Уһук Илини сайыннарыы министиэристибэтин үлэтин кэҥэтэр туһунан ыйаахха илии баттаата
Владимир Путин “Арассыыйа Федерациятын Арктика зонатын сайыннарыы эйгэтигэр судаарыстыбаннай салайыыны тупсарар туһунан” ыйаахха илии баттаата. Тустаах ыйааҕынан Уһук Илини сайыннарыы министиэристибэтэ Уһук Илини уонна Арктиканы сайыннарыы министиэристибэтэ диэн уларытан ааттанна.
edersaas.ru
“Арктика зонатын сайыннарыы эйгэтигэр судаарыстыба салайыытын көдьүүһүн үрдэтэр туһуттан бу быһаарыы ылынылынна”, — диэн докумуоҥҥа этиллэр.
Тохсунньуга судаарыстыба баһылыгын кытта миниистирдэр кэбиниэттэрин баһылыга Дмитрий Медведев көрсүһүүтүгэр кини Уһук Илини сайыннарыы министиэристибэтин толорор үлэтигэр Арктика боппуруостарын эбэр туһунан бэлиэтээбитэ, бу үлэни бырабыыталыстыба таһымыгар тиһиктээхтик ыытар туһуттан.
“Быһаарыы ылылынна, министиэристибэҕэ сүктэриллибит сорудахтары толоруохпут. Уһук Илиҥҥи сайдыы министиэристибэтэ урут даҕаны Уһук Илин регионнарын Арктика сиригэр-уотугар сыһыаннаах кэккэ боппуруостары сүрүннүүрэ, манна Саха сирэ, Чукотка автономнай уокуруга, Хотугу муора суолун сайыннарыы киирэллэрэ. Бүгүн биһиги балачча үөрүйэхтэннибит, ураты суолтаны көрөр режими уонна өйөбүлү олохтооһуҥҥа улахан үлэ ыытылынна, туох-ханнык иннинэ, социальнай эйгэҕэ, сайдыы институттарын үлэтэ олохтонно. Улахан үлэ күүтэр, судургута суох соруктары быһаарыахтаахпыт, балары олоххо киллэрэргэ дьулуһуохтаахпыт”, — диэтэ Уһук Илини сайыннарыы министиэристибэтин баһылыга Александр Козлов.
Биһ. корр., edersaas.ru