РФ бэрэсидьиэнэ Владимир Путин Федеральнай Мунньахха Анал этиитигэр дьадайыыны аҕыйатыыга, элбэх оҕолоох дьиэ кэргэттэргэ көмөлөһүүгэ болҕомтотун туһаайда.
edersaas.ru
Холобур, дьадайыыны утары охсуһарга “социальнай хантараак” көдьүүстээх буолуо диэн эттэ. Ыал бэйэтэ хаһаайыстыба тэринэригэр, бэйэ дьыалатын арынарыгар, эбэтэр идэтин уларытарыгар көмөлөһүөхтээх. Ол эбэтэр, үлэлээн-хамсаан олоҕун таһымын тупсарыан баҕарар, дьиэ кэргэнин иитэр эбэһээтэлистибэни ылынарыттан куттаммат киһиэхэ көмөлөһүөххэ наада диэн этэр. Маннык көмөнөн дойду үрдүнэн 9 мөлүйүөн киһи туһаныан сөп диэн сабаҕалыыллар.
Бэрэсидьиэн “социальнай хантараак” ньыматын номнуо үлэлэтэр эрэгийиэннэргэ федеральнай бүддьүөттэн кыттыгас үбүлээһини ыытар туһунан эттэ. Манна диэн эттэххэ, Саха сиригэр бу ньыма 2013 сылтан үлэлиир. Ол түмүгэр сыллата 500-700 хантараак түһэрсиллэр. Үбүлээһин өрөспүүбүлүкэ бүддьүөтүттэн барар. Тиийинэн олоруу алын кээмэйиттэн кыра дохуоттаах ыалга (ортотунан), эбэтэр соҕотоҕун олорор киһиэхэ бэриллэр. Маннык көмөнү, бастатан туран, элбэх оҕолоох кыаммат ыалга биэрэллэр.
2013-15 сылларга барыта 2066 кыаммат ыалы, 1995 соҕотох олорор дьону кытта хантараак түһэрсиллибитэ.
2015 сылга 48 мөлүйүөн суумалаах 400 хантараак түһэрсиллибитэ. 2016 сылга 493 кыаммат ыалга көмө оҥоһуллубута. Оттон 2017 сылга 700 хантараак түһэрсиллэн, үгүс ыалларга көмөлөспүтэ. Тыа сирин сайыннарыы бырагырааматын чэрчитинэн, көрүллүбүт үп-харчы 85%-на тыа сиригэр олорор дьоҥҥо, ыалга бэриллэр.
Саха сиригэр былырыын ааҕан көрүү түмүгүнэн, 27 тыһыынча ыал дохуота намыһаҕынан, судаарыстыба көмөтүгэр наадыйара биллибитэ. Баларга 96 тыһыынча киһи баар, ол эбэтэр өрөспүүбүлүкэ нэһилиэнньэтин 10%-на.
2019 сылга Владимир Путин эппит социальнай чэпчэтиилэрин олоххо киллэриигэ барыта 80 миллиард солкуобай наада буолуо диэн вице-премьер Татьяна Голикова сабаҕалаата.
Ангелина Васильева, “Саха сирэ” хаһыат, edersaas.ru