Вице-премьер Кирилл Бычков: экэниэмикэ, бырамыысыланнас, тутуу тула кэпсэтии саҕаланна
СӨ ситэриилээх былааһын ааспыт сыллааҕы үлэтин отчуота быйыл эмиэ онлайн киэбинэн ыытыллар. Бүгүн, олунньу 6 күнүгэр, «Саха» НКИХ, «Якутия 24» телеханаалларынан СӨ Бырабыыталыстыбатын бастакы вице-премьерэ Кирилл Бычков отчуоту саҕалаата.
Кирилл Бычков 2021 сыл түмүгүнэн экэниэмикэ, инвестиционнай уонна нолуок политикатыгар, бырамыысыланнаска, тутууга, архитектураҕа уонна куораты тутууга, нэһилиэнньэ дьарыктаах буолуутугар, судаарыстыба оҥорор өҥөтүгэр туох үлэ-хамнас ааспыт сылга ыытыллыбытын кэпсээтэ.
Ол курдук бырамыысыланнай оҥорон таһаарыы индексэ кэнники 11 сылга муҥутуур үрдүк көрдөрүүлэннэ итиэннэ 2020 сылы кытты тэҥнээтэххэ 116,1% тэҥнэстэ, оттон 2019 сыл таһымыгар тэҥнээтэххэ 110,6% буолла. Урукку кэмнээҕи үрдүк көрдөрүүлэр тупсарылыннылар: 25,8 мөл. туонна чох (2020 сыл кээмэйиттэн 1,6 төгүл үрдүк), 17,3 мөл. туонна ньиэп (108,1%), 14 млрд куб.м. гаас (2 төгүл), 42 туонна кыһыл көмүс (103,3%) уонна 130 туонна үрүҥ көмүс (1,5 төгүл) хостонно. 2021 сылга сүрүн хапытаалга инвестицияны тардыы кээмэйэ 2020 сылы кытта тэҥнээтэххэ 131% үрдээн, 305 млрд солкуобайга тэҥнэстэ. “Илиҥҥи Денисовскай” шахта иккис уочарата үлэҕэ киирдэ, Томпо оройуонугар Нежданинскай хайаны байытар кэмбинээти тутуу түмүктэннэ.
Инфраструктураны тэрийии тэтимэ түргэтээтэ: саҥа оскуолалар, уһуйааннар, суоллар, аэропуортар, сибээс волоконнай-оптическай лииньийэлэрэ баар буоллулар. Социальнай суолталаах 46 бөдөҥ эбийиэк үлэҕэ киирдэ, ол иһигэр уопсайа 1 320 миэстэлээх 10 оскуола, 2 170 миэстэлээх 13 уһуйаан, култуура 7, доруобуйа харыстабылын 10 эбийиэгэ (уопсай быраактыка бырааһын 1 офиһа, 5 быраас амбулаторията, 3 ФАП, 1 суһал медицинэ көмөтүн отделениета), физическэй култуура уонна успуорт 5 эбийиэгэ уонна Бүлүү улууһун Сосновка с. Бүлүүтээҕи психоневрологическай интэринээт-дьиэ 150 миэстэлээх олорор куорпуһа.
Отчуокка СӨ экономика миниистирэ Майя Данилова, тутуу миниистирэ Павел Кылатчанов, бырамыысыланнас уонна геология миниистирэ Максим Терещенко, нэһилиэнньэ дьарыктаах буолуутун судаарыстыбаннай кэмитиэтин бэрэссэдээтэлэ Елена Калашникова, СӨ Ил Дархаҥҥа архитектураҕа уонна куораты тутууга управление салайааччыта Ирина Алексеева, уо.д.а. кыттыыны ылаллар.
edersaas.ru