Маны аах Тыа хаһаайыстыбата

Виталина Попова: “Бэйэбит олохтоох аспытыгар эрэнэр кэммит кэллэ”

Бүгүн СӨ Бырабыыталыстыбатын 2 №-дээх дьиэтигэр Саха Өрөспүүбүлүкэтин бааһынай хаһаайыстыбаларын уонна кэпэрэтииптэрин ассоциациятын отчуоттуур-быыбардыыр кэмпириэнсийэтэ буолла.

Кэмпириэнсийэҕэ делегаттар көхтөөхтүк кытыннылар. Ассоциация бэрэсидьиэнэ Александр Артемьев ыытыллыбыт үлэ туһунан сиһилии отчуоттаата. Урутаан эттэххэ, Александр Артемьев ыыппыт үлэтин ассоциация чилиэннэрэ биһирээтилэр. Биир да күн өрөбүлэ суох үлэлиир тыа хаһаайыстыбатын үлэһиттэрин доруобуйаларын туругун тупсарыыга, биэнсийэлэрин үрдэтиигэ туруорсар наадалааҕын ыйдылар. Үлэ-хамнас, бааһынай хаһаайыстыбаларын уонна кэпэрэтииптэрин кыһалҕалаах, тыын боппуруостарын тула санааларын аһаҕастык этиннилэр, сонун этиилэри киллэрдилэр.

Кэмпириэнсийэ үлэтигэр СӨ Бырабыыталыстыбатын бэрэссэдээтэлин солбуйааччы Михаил Никифоров, тыа хаһаайыстыбатын миниистирэ Александр Атласов, солбуйааччыта Николай Афанасьев уо.д.а. атын салайааччылар кытыннылар. Үгүс ыйытыыларга хоруйдаатылар. Кирэдьиити ылыы, бэтэринээрдэр хааччыйыыларын, тастан киирбит хааччахтааһыннарынан сибээстээн ылыллар уонна ылыллыахтаах миэрэлэр уо.д.а. тустарынан эттилэр, сүбэ-ама биэрдилэр.

Бу кэмпириэнсийэҕэ Таатта улууһуттан кыттыбыт  Виталина Попова, төһө да бириэмэ ыгым буоллар, санаатын маннык үллэһиннэ:

Билигин бу аан дойдутааҕы балаһыанньанан үөскээбит кэмҥэ, күҥҥэ-дьылга Саха сирин курдук тыйыс айылҕалаах сиргэ тыа хаһаайыстыбатын олох күүскэ өйүөххэ. Тастан киирэр ас-үөл, бородууксуйа хааччахтанан, бэйэбит олохтоох аспытыгар-үөлбүтүгэр эрэнэр кэммит кэллэ быһыылаах. Онон тыа хаһаайыстыбатын табаарын оҥрооччуларын бородууксуйалара өрө тахсыахтаах. Биһиги бааһынай хаһаайыстыбабытын дьиэ кэргэнинэн иилээн илдьэ сылдьабыт. Кыстык этэҥҥэ баран иһэр. Үүппүтүн “Баай ас” кэпэрэтиипкэ туттарабыт. Сүөһү аһылыгар  зеленка курдук үүнээйини ыһыы олус туһалаах эбит диэн санааҕа кэллибит. Оппут баар, онон эрэх-турахпыт. Атын эрэгийиэннэргэ тэҥнээтэххэ, Саха сиригэр көмө, өйөбүл баарын бэлиэтиибин. Ол курдук, 2015 с. саҥа саҕалааччы диэҥ граҥҥа кыттан, хотоммутун саҥардыбыппыт, тыраахтар ылыммыппыт. Ол эрээри билигин сыана үрдээн эрэрэ дьиксиннэрэр. Тыа дьоно саамай наадыйар МТЗ-82 тыраахтарбыт 2 мөл 400-тэн 4 мөл солкуобайга тиийбит диэн бу мунньахха эттилэр. Онон төһө да уустук буоллар, хаһаайыстыбалар бэйэ бородууксуйатынан хааччыйыыга сыралаһыахпыт.

Бэлэмнээтэ Женни Стрюкова

Хаартыска: В.Попова

0
0
Telegram @edersaas20