Виталий Чикачев ОДьКХ МКА эрэгийиэннээҕи быһыы-майгы киинин хонтуруоллаата
“СӨ ОДьКХ” ГУП генеральнай дириэктэрэ Виталий Чикачев соторутааҕыта ОДьКХ эйгэтигэр саахалланар балаһыанньаны кэтээн көрүүгэ уонна хонтуруоллааһыҥҥа эрэгийиэннээҕи ситуационнай киин үлэтин билистэ.
Бу киини 2021 сыллаахха тэрилтэ киин диспетчерскэй сулууспатын отделын базатыгар “Дьиэ-уот хомунаалынай хаһаайыстыбатын эбийиэктэригэр саахалы араас быһылааннары кэтээн көрүүгэ уонна хонтуруоллааһыҥҥа тиһик “ федеральнай бырагырааматын чэрчитинэн арыйбыта. Манна исписэлиистэр суукканы эргиччи ааспыт сыл муус устар ыйыттан хомунаалынай хаһаайыстыбаҕа тахсыбыт ыксаллаах түгэннэри бэлиэтииллэр.
Диспетчердэр сулууспаларын начаалынньыга Николай Иванов уонна бу отдел кылаабынай исписэлииһэ Юрий Попов генеральнай дириэктэргэ бу киин үлэтин билиһиннэрдилэр.
Бүгүн бары оройуоннарга ОДьКХ МКА тиһигэр чахчылары тириэрдэр оператор-поставщиктар ананнылар. Муниципалитеттар уонна ресурсанан хааччыйар дуоһунастаах дьоҥҥо бырагыраамаҕа киирэн үлэлиир кыах бэрилиннэ. Бу киин үлэлиэҕиттэн 2863 түгэн бэлиэтэннэ: 34 саахал, 512 инцидент уонна 2001 былааннаах түгэн.
Бу тиһиккэ көдьүстээхтик 8 оройуон үлэлиир: Алдан, Бүлүү, Горнай, Нерюнгри, Ньурба, Өлүөхүмэ, Сунтаар уонна Хаҥалас. Иһитиннэриини Мииринэй, Томпо оройуоннара, Дьокуускай куорат уонна “Жатай бөһүөлэгэ” киллэрбэттэр.
“Суһал быһаарыыны ылынарга, киирбит иһитиннэриини хонтуруоллуурга оройуоннар биир кэлим дьуһуурунай –диспетчерскэй сулууспаларын кытта ыкса үлэни тэриийэххэ, кинилэри ОДьКХ МКА тиһигэр үлэҕэ кытыннарыахха. Сотору кэминэн эппиэттээх дьоҥҥо үөрэтэр вебинар тэриллиэҕэ уонна бассаап мессенджеригэр оробуочай бөлөх тэриллиэҕэ”, — диэтэ генеральнай дириэктэр Виталий Чикачев.
ОДьКХ МКА тиһигин үлэтин тэрийиигэ бары ыйытыылары суукканы эргиччи маннык төлөпүөнүнэн ылаллар: (4112)39-24-49.
“СӨ ОДьКХ” ГУП пресс-сулууспата
Хаартыска: тустаах саайтан
Бэлэмнээтэ Женни Стрюкова.