Виталий Андросов салгыы Дьокуускайга эмтэниэҕэ (СУРАҔЫ ЧОПЧУЛААҺЫН)

Субу  соторутааҕыта,  Москваны кытта сибээстэһэ олорорун билэр буоламмыт, Виталий Тимофеевич истиҥ доҕорун, суруналыыс Иван Ушницкайы кытта телефонунан кэпсэтэ сырыттыбыт.

Иван Петрович онуоха маннык диэтэ:

— Интэриниэт ситимигэр, ватсапка доҕорум Виталий туһунан бэрэбиэркэлэммэтэх сураҕы-садьыгы тарҕаталларын истээт, бастаан, соһуччута бэрдиттэн, сүрэҕим хайда сыспыта…   Виталий Тимофеевич Москваҕа, Сеченов аатынан 1-кы мединститут клиникэтигэр обследованиены барда, эмтэннэ. Кини олох эдэр сааһыттан чугас доҕорун, Москваҕа олорор, үлэлиир  Григорий Евсеевтыын сибээһи тутан олоробун. Григорий Трофимович, бу олох аҕыйах мүнүүтэ анараа өттүгэр биллэрбитинэн, бүгүн киэһээҥҥи рейсинэн Виталий Тимофеевич Москваттан Дьокуускайга көтөр. Манна кэлэн салгыы эмтэниэҕэ, онтон эпэрээссийэ боппуруоһа хаттаан көрүллүөҕэ, диэтэ.

Мин кырдьаҕас дьон оҕолоробун, онон, итэҕэйэбин — киһини, алҕас, өллө диэтэхтэринэ, ол киһи төттөрүтүн, тиллэн-тыллан кэлэр… Виталий санаата күүстээх уонна Таҥара кини курдук үтүө киһини хайаан даҕаны көрүө, көмөлөһүө диэн эрэнэбин.

Андросов Виталий Тимофеевич, медицинскэй наука кандидата, М.К.Аммосов аатынан ХИФУ медицинскэй институтун терапия кафедратын доцена, Мединститут Выпускниктарын ассоциациятын бэрэссэдээтэлэ. Биллиилээх мелодист, самодеятельнай композитор, 130-тан тахса ылбаҕай ырыа ааптара. Кини “Туундара”, “Хаарчаана”, “Сибэккилэр түһүүллэр”,  “Маҥнайгы хаар”, онтон да атын айымньылара – норуот уоһуттан түһэрбэт таптыыр ырыалара.

Татьяна Маркова, «Саха сирэ» хаһыат, edersaas.ru

Хаартыскаҕа: Виталий Андросов доҕоро Григорий Евсеевтыын.