Хатас с. «Тускул» Култуура киинигэр киһи эрэ сүргэтэ көтөҕүллэр, санаата манньыйар бэлиэ тэрээһин буолан ааста.
edersaas.ru
Ол курдук, медицинскэй наука кандидата, ХИФУ доцена, ырыаһыт, мелодист, «Саха» НКиК уопсастыбаннай сэбиэтин бэрэссэдээтэлэ, ХИФУ медицинскэй институтун бүтэрбиттэр ассоциацияларын салайааччыта, «Алампа» көҥүл түмсүү түсчүтэ, РФ суруналыыстарын сойууһун чилиэнэ Виталий Андросов биир ырыатын аатынан «Үйэлээх тапталым» диэн мюзикл-испэктээкил үрдүк таһымнаахтык ааста. Бу бырайыак салайааччыта – «Тускул» Култуура киинин дириэктэрэ Людмила Чепалова.
Күндү ыалдьыттарынан Галина Захаренко, Мария Неймохова, Зоя Багынанова, Василий Гоголев-Уйулҕан, Данил Марков уо.д.а. ыҥырылыннылар.
Хатас олохтооҕо, мюзикл-испэктээкил көрөөччүгэ тиийэригэр сүүрбүт-көппүт Наталья Руфова: «Сонун мюзиклы көрөөччү астынна, ылынна, чуумпуран олорон көрдө, дьоруойдары кытары биир тэтимҥэ киирэн, тэҥҥэ хомойдо, таптаата, сонньуйда-соҥуорда, үөрдэ, сүргэтэ көтөҕүлүннэ – быһатын эттэххэ, испэктээкил дьоруойдарын олоҕунан олордо. Ол тухары санаа хайа диэки хайыһар да, онно сөптөөх ырыа ылланан истэ», – диэн үгүс көрөөччү аатыттан санаатын үллэһиннэ.
Сүрүн оруоллары толорбут Виктория Никифорова, Валентина Исакова оҕо эрдэхтэриттэн ыллаабыт киэҥ уораҕайдарыгар тахсаннар, талааннарын атын кырыытын чаҕылыта оонньоттулар. Кинилэр оонньууларын норуодунай тыйаатыр артыыстара Андрей Малышев, Алексей Осипов уо.д.а. ситэрэн-хоторон биэрдилэр.
Туруорааччы-режиссер Евдокия Семенова, көмөлөһөөччү режиссер Колымана Ларионова, Татьяна Окорокова, Алексей Калининскай—Луҥха Өлөксөй ааптар араас кэмҥэ суруйбут 140-тан тахса ырыатыгар таба тайаммыттар. Уот-күөс, дорҕоон өттүгэр үлэлэспит Алексей Иванов, Татьяна Григорьева көмөлөрүнэн испэктээкил силигин ситтэ.
Туруорааччылар ааптары бэйэтин кытары эрдэттэн көрсөн, сүбэ-ама ылан биир санаанан үлэлээбиттэригэр ытыктыыр киһилэригэр, истиҥ иэйиилээх ырыаларынан саха норуотун кутун туппут Виталий Тимофеевичка махталлара улахан.
«Дьоруойдарбыт олоҕунан олордубут»
Сүрүн оруолу толорбут Виктория Никифорова:
«Бэйэм кыра эрдэхпиттэн тапталлаах Хатаһым кулуубун сценатыгар ырыа эйгэтигэр чугас этим, ырыанан арыалланан улааппытым да диэхпин сөп. Онтон ансаамбылым салайааччыта Татьяна Окорокова мюзиклга оруол оонньуугун диэбитигэр бэрт улгумнук сөбүлэнэн бараммын, арай оонньоотоҕум ахсын уустугуран, ыараан испитэ. Ол эрэн, наһаа интэриэһинэй, умсугутуулаах курдук. Оруолбар киирэн, дириҥээн истэҕим аайы олоххо олус да элбэх араас иэйии, үөрүү-хомолто, үрүҥ-хара тэҥҥэ хардыылыы сылдьар эбит диэн сөхпүтүм. Аны ол өйдөөбүппүн оонньоон көрдөрүөхпүн наада эбит. Чэ, ол гынан баран, дугдуруй да оҕус диэбит курдук, сөбүлэнним да оҥордум. Биллэн туран, барыта сүүс бырыһыан табылынна диир кыаҕым суох. Ол эрэн, бэйэбэр саҥа эйгэни арыйбыппыттан үөрэбин».
Андрей Малышев: «Виталий Андросов ырыаларын эдэр эрдэхпиттэн сэргиибин, бэл диэтэр, Ленинград куорат киэҥ уораҕайыгар сылдьан доргуччу, үөрэ-көтө ыллыы-туойа сылдьыбытым. Оччолордооҕу ыччат кутун туппут ырыаларыттан биирдэстэрэ «Дьиэрэй ырыам» этэ».
Оттон мюзикл-испэктээкил «буруйдааҕа» Виталий Тимофеевич норуодунай тыйаатыр артыыстарын саҥа үлэлэригэр үйэ аҥаарыттан ордук кэм анараа өттүгэр суруйбут ырыаларыттан саҕалаан, былырыыҥҥа диэри суруллубут ырыаларын сатабыллаахтык аттаран, дьүөрэлээн урукку уонна билиҥҥи кэми ситимнээбиттэрин долгуйа көрдө уонна махталын биллэрдэ.
ЫСПЫРААПКА:
Хатас с. «Тускул» Култуура киинин иһинэн үлэлиир норуодунай тыйаатыр үлэтэ-хамнаһа куруук биһирэнэр. Кэлэктиип өрөспүүбүлүкэ биллэр ааптардарын, ырыа суруйааччыларын кытары биир санаанан үлэлиир. Суруйааччы Дмитрий Наумов хас да испэктээкилин туруоран, улуустарга гастроллаатылар.
Галина Шахурдина айар үлэтинэн театрализованнай дьүһүйүүлэрэ уонна кини ырыаларыгар икки килииптэрэ Интернет нөҥүө киэҥник тарҕанна. Ону сэргэ, Ютуб ситимигэр угуллубут сценкалары уонунан тыһыынча киһи көрөн сэҥээрбитин биллэрэр.
Надежда ЕГОРОВА, «Саха сирэ» хаһыат, edersaas.ru