Вита Мир: мин – сахабын (ВИДЕО)

Бөлөххө киир:

Питер кыыһа Ависта Мир “Мисс Виртуальная Якутия” куонкурус сүүмэрдиир түһүмэҕэр кыттар. Бастаан утаа дьон “Саха сиригэр туох сыһыаннааҕый” диэн муодарҕаабыттара, сүөргүлээччилэр даҕаны көстүбүттэрэ. Аан дойдуга аатырар “ELLE”, “Cosmopolitan”, “Harpers Bazaar”, “Wedding Vouge” сурунаалларга үлэлэһэр Вита куонкуруска Үөһээ Халыма аатыттан кыттар.

Ийэм – юкагирка, аҕам – перс

Куонкуруска миигин элбэх киһи өйөөбүтүттэн олус үөрдүм. Ол гынан баран, элбэх киһи, ордук эр дьон, мин кыттарбын сөбүлээбэтэх. “Дьиҥнээх саха буолбтах”, “Саха сиригэр олорботох” уонна “Брежнев курдук хаастаах” – дииллэр. Хоруйдуубун. Саха сириттэн төрүттээхпин хас биирдии кастиҥҥа, дьону кытта билистэхпинэ кэпсиибин уонна киэн туттабын. Сахабын – дэнэбин. Агентстволар “кореянка, бразильянка булкаастаахпын” дэттэрэ сатаатахтарына даҕаны, акаастыыбын.
Оттон хааспын балтараа сылы быһа үүннэрбитим. Урут синньигэс хаастаах этим. Арба, саамай элбэхтэ туттар тылым – сахалыы “айака”. Тоҥ балыгы сөбүлүүбүн. Ийэбэр Саха сириттэн ыытааччылар.
Ийэм Зырянка юкагирката. Санкт-Петербурга Хотугу норуоттар институттарыгар юкагир тылын үөрэтэр. Аҕам омугунан перс, Афганистантан төрүттээх беженец этэ. Мир – диэн аҕам араспаанньата. Ависта –“Авеста” диэн персидскэй уус-уран айымньы аатыттан таһаарбыттар.
Питергэ күн сирин көрбүтүм, онтон оҕо сааһым Халымаҕа, эбэбэр, ааспыта. Билигин Лондоҥҥа баарбын. Питергэ оскуоланы бүтэрбитим, доҕотторум, дьиэ кэргэним онно олорор. Сингапуру олус сөбүлүүбүн.
Дьокуускайга олох оҕо эрдэхпинэ сылдьыбытым. Билигин тиийиэхпин баҕарабын.

Үйэм тухары модель буолбаппын

Ийэм модель буоларбын баҕарар этэ. Дьонум иккиэн үрдүк уҥуохтаахтар: аҕам – 183 см., ийэм – 163 см., мин – 173 см. Ордук азиаткам хаана баһыйбыт дии саныыбын. Моделлаабытым үс сыл буолла. Бастаан хаһыакка биллэриини ааҕан кастиҥҥа тиийбитим. Хара кырдьыахпар диэри модель буолар санаам суох.
Ол эрээри бэйэҕин үчүгэйдик көрүнэр буоллаххына, 80-90 сааскар диэри үлэлиэххин сөп. Холобур, Кармен Делль’Орефиче 80-с хаарын санныгар уулларыар диэри курутуой сурунаалларга анаан уһуллар.
Билигин элбэхтик айанныыбын. Азияны устатын-туоратын бараатым быһыылаах. Ыллыырбын, гитараҕа оонньуурбун сөбүлүүбүн. Кытай тылын үөрэтэбин, онно эбии испанскайы эмиэ. Английскайдыы саҥарабын. Омук тылыгар сыһыаннаах үлэһит быһыытынан көрөбүн инникибин. Кэтэхтэн Москваҕа тылбаасчыт идэтигэр үөрэнэбин.

Күнүм төлөпүөнтэн саҕаланар

Күммүн лимоннаах ууттан саҕалыыбын диэм этэ даҕаны, харахпын хайа тардаат төлөпүөммүн көрөбүн. Социальнай ситими “хасыһабын”, сообщениеларга хоруйдуубун.
Диетаны улаханык тутуспаппын. Ыһаарыламмыт, сыалаах-арыылаах аһы сиэбэппин, фаст-фуду эмиэ сөбүлээбэппин. Биирдэ эмит сакалаат, минньигэс сиибин. Нэдэлэҕэ иккитэ-үстэ спорт-саалҕа сылдьабын.

Үлэбин сөбүлүүбүн

Араас дойдуну көрөрбүн, атын култуураҕа сыстарбын астынабын. Үлэбиттэн олус дуоһуйабын эрээри, модель үлэтэ сылаалаах. Истириэһи, ыгым эрэсиими тулуйар, кэпсэтинньэҥ, холку майгылаах буолуохтааххын. Сороҕор өрөбүлэ суох үлэлиигин. “Сылайдым” диэн тылы умнуохтааххын. Үлэҥ түмүгүттэн үөрүүҥ сылайбыккар тэҥнэммэт.
“NIKON” хампаанньаҕа хаартыскаҕа түспүппүн өйдөөн хаалбыппын. 88-с этээскэ шариктар быыстарыгар үлэлээбиппит. Үс чааһы быһа тохтоло суох ойуоккалаабытым. Хаһан үчүгэй кадр табыллыар диэри.
“Avon” косметика брендин, “Lays” чипсы рекаламатыгар уһуллубуппуттан астынабын. Тайваньҥа “Wedding Vouge” сурунаал сирэйигэр анаан түспүт фотосессиябын эмиэ сөбүлүүбүн.
“Мисс Виртуальная Якутия” куонкурус саҥа таһымҥа, аан дойдуга тахсарыгар баҕарабын. Күөн күрэс туһунан Питергэ сылдьан Есения Софронова диэн фотографтан истибитим. Кини эмиэ Саха сириттэн сылдьар. Лондоҥҥа барыам икки күн баарына суһаллык Есенияҕа хаартыскаҕа түһэн, сайаапкабын биэрбитим. Эмиэ саха кыыһа, визажист, Ирина Санникова сирэйбин кырааскалаабыта. Урут кэрэ кыргыттар куонкурустарыгар кытта илигим, бу – бастакы холонуум. “Мисс Виртуальная Россия” куонкуруска Саха сирин чиэһин көмүскүөхпүн баҕарабын.

Хаартыскалар, видео дьоруой тус архыыбыттан ылылыннылар