Виртуоз-хомусчут Спиридон Шишигин «Поле чудес” биэриигэ кытынна
«Поле чудес» биэрии Саха АССР 100 сылыгар аналлаах таһаарыытыгар Саха сириттэн өссө виртуоз-хомусчут Спиридон Шишигин кытынна.
— Биэриини устуу кэнниттэн олус үчүгэй санаа хаалла. Бэйэм сөбүлүүр истиилбэр хомуска оонньоон астынным, төрүт култуурабытын, Сахабыт сирин уратытын Арассыыйа «Бастакы» ханаалыгар билиһиннэрдим.Төһө да бириэмэ ыгымын иһин бары бэлэхтэри биэрии ыытааччыта Леонид Якубовичка туттардым, — диэн санаатын үллэһиннэ Спиридон Шишигин.
Бэлиэтээн эттэххэ, хомуска импровизациялаан оонньууну Томпо улууһуттан “Маранга” үҥкүү кэлэктиибэ доҕуһуоллаабыт. Маны сэргэ, Спиридон Шишигин М.К.Аммосов аатынан ХИФУ, “Көмүлүөк”, “Сахачай”, “Ректайм”, Покровскай куорат оскуолатын кэлэктиибин уонна Хомус аан дойдутааҕы киинин уонна мусуойун аатыттан саха хомуһун уонна варганнай муусука инструменнарын каталогын бэлэх ууммут. Биэриини ыам ыйын 13 күнүгэр көрдөрүөхтэрэ.
Талааннаах саха виртуоз-хомусчута Спиридон Шишигин Покровскайдааҕы орто оскуола дириэктэринэн үлэлиир. Норуоттар икки ардыларынааҕы Хомус бырабылыанньатын чилиэнэ. Кини 1991 сыллаахха варганнай муусука кэнгириэһигэр кыайыылааҕынан тахсан Аан дойду виртуоз-хомусчута үрдүк ааты ылбыта.
Кини быйыл бэс ыйыгар Саха сиригэр ыытыллар Норуоттар икки ардыларынааҕы III төгүлүн ыытыллар «Аан дойду виртуоз-хомусчута» куонкуруска бочуоттаах ыалдьыт быһыытынан кыттыаҕа. Бу улахан тэрээһиҥҥэ уопсайа 40 виртуоз-хомусчут 14 дойдуттан, 10 эрэгийиэнтэн кыттыыны ылыаҕа. Бэлиэтээн эттэххэ, виртуоз-хомусчут аатын ылар бу соҕотох куонкурус буолар. III төгүллээх норуоттар икки ардыларынааҕы куонкурус РФ бэрэсидьиэнин Гранын өйөбүлүнэн ыытыллар.
Куонкуруһу тэрийээччинэн СӨ бырабыыталыстыбата, култуура уонна духуобунай сайдыы министиэристибэтэ, ону сэргэ Хомус аан дойдутааҕы киинэ уонна мусуойа, Норуоттар икки ардыларынааҕы варган уопсастыбата буолар.
Ульяна ЗАХАРОВА.
Хомус аан дойдутааҕы киинин уонна мусуойун тус архыыбын хаартыскалара туһанылыннылар.