Виртуальнай мусуой — ураты саайт

Бөлөххө киир:

Дьиэҕэр олорон эрэ, буор-босхо мусуойга сылдьыаххын, элбэҕи билиэххин-көрүөххүн баҕараҕын? Оччоҕо “Сунтаар улууһа сэрии сылларыгар” диэн виртуальнай мусуойга virt-museum.usite.pro ыалдьыттаан аас.

Саайты арыйдыҥ эрэ, устуоруйаны, араас сонуну көрөҕүн-билэҕин. Оттон ыччат дьон, оҕолор биир кэлим суругу-бичиги ааҕалларын сөбүлээбэттэр, хамсыыр хартыыҥкалардаах, муусукалаах, ойуулардаах, видеолаах, оонньуулаах, киинэлээх, кэпсиир саҥалаах, мультимедийнэй информацияны ордук ылыналлар.
Бу виртуальнай мусуой саайта эмиэ оннук оҥоһуллубут. Мусуой 9 саалалаах. Саалалары арыйан истэҕиҥ аайы Сунтаар улууһа Аҕа дойдуну көмүскүүр Улуу сэрии сылларыгар хайдах-туох олорбутун, дьоно-сэргэтэ хорсуннук сэриилэспиттэрин, тыылга үлэлээбиттэрин, фроҥҥа тугунан көмөлөспүттэрин, Кыайыы ыһыаҕын, о.д.а. туһунан билэҕин. Бу барыта нэһилиэктэринэн араарыллан, историческай чахчыларга, докумуоннарга олоҕуран оҥоһуллубут.


Маны таһынан, Ленинград, Сталинград, Москва иһин киирсиилэри, Ильмень күөллээҕи, Ржевскэй, Курскай кыргыһыылары, Дьоруой пионердары, партизаннары, байыаннай билиэннэйдэри, концлааҕырдары, Кэмпэндээйи хаайыытын, о.д.а. кэпсиир, билиини-көрүүнү хаҥатар суруйуулар, лиэксийэлэр бааллар. Холобур, улуу кыргыһыылар каарталара баар, манна икки өттүттэн төһө сүтүк тахсыбыта, кыдыйсыы уопсай хаамыыта, түмүгэ, Сунтаар буойуннара онно кыттыылара, о.д.а. элбэх информация баар.


Барытын көрөн-истэн, тутан-хабан көрөр, хамсатар буолан, сүрдээх сэргэх, интэриэһинэй. Холобур, улуус нэһилиэнньэтэ сэрии сылларыгар 21 511 киһиттэн (1939 сыллаахха) 14 118 киһиэхэ (1945 сыллаахха) диэри көҕүрээбитэ олус хараастыылаах суол. Дьон ахсаана нэһилиэктэринэн арааран оҥоһуллубут, сыллары баттаатаҕыҥ аайы, илэ-бааччы көҕүрээн иһэрин, графика быһыытынан көрөрүҥ ордук итэҕэтиилээх.

Мобильнай сыһыарыылара эмиэ олус интэриэһинэйдэр. Киин көрүдүөрүгэр сенсорнай панель турарын арыйан көрдүм. Эмиэ ырыалаах, саҥалаах, инфографикалаах, ойуулаах, видеолаах, элбэх информациялаах. Саллааттар суруктара угуллан сылдьалларын сэргээтим.

Виртуальнай мусуойу оҥоруу туохтан саҕаламмытай? 2019 сыллаахха Сунтаардааҕы оҕо айымньытын киинэ улуус сэрии сылларыгар олоҕун-дьаһаҕын туһунан кинигэ бэлэмнээбитэ. Нэһилиэктэринэн көрдөөһүн, ахтыы хомуйуу, о.д.а. дьаныардаах үлэ саҕаламмыта.
Бу “Во имя жизни” кинигэ тахсыбытын кэнниттэн, аны виртуальнай мусуой, сайт оҥоруохха диэн идиэйэ киирбитэ. Улуу Кыайыы 75 сылын көрсө «Наследники Победы» диэн бырайыак үөскээбитэ. Бу үөрэтэр, култуурунай-мультимедийнэй бырайыак 5 түһүмэхтээх: виртуальнай мусуой, саайт уонна мобильнай сыһыарыылар, видеонан устуу, сувенирнай бородууксуйалар, көмпүүтэр бырагыраамаларыгар информационнай база, хас биирдии бэтэрээҥҥэ тус паапканы оҥоруу, о.д.а.


Бырайыагы олоххо киллэрэргэ олус элбэх киһи үлэлэспитэ: учууталлар, мусуойдар, бибилэтиэкэлэр, архыып үлэһиттэрэ, кыраайы үөрэтээччилэр, программистар, видеографтар, волонтердар… Нэһилиэктэргэ “Вахта памяти” диэн эспэдииссийэлэр тэриллибиттэрэ.
Билигин виртуальнай мусуой бэркэ үлэлии турар. Аҕа дойду сэриитин кыттыылаахтарын, тыыл бэтэрээннэрин үйэтитиигэ, устуоруйаны табыгастаах ньыманан көрдөрүүгэ, үүнэр көлүөнэни патриотическай иитиигэ дьоһун үлэ буолбут. Саха сиригэр өссө оҥоһулла илик баай ис хоһоонноох, ураты саайт диэн этиэхпин сөп.
Киин үлэһиттэрэ салгыы САССР 100 сылыгар анаммыт бырайыактарыгар үлэлии сылдьаллар, бу сыл ахсынньытыгар бүтүөхтээх. Бырайыак Сунтаар улууһун 100 сыллаах сайдыытын көрдөрүөхтээх.

Ангелина Васильева, «Саха сирэ» хаһыат, edersaas.ru

Хаартыска: ааптар түһэриилэрэ.

+1
0
+1
0
+1
0
+1
0
+1
0
+1
0
+1
0