Тыа хаһаайыстыбата

Винтик сиэмэтэ чахчы үчүгэй эбит

От ыйын саҥатыгар “Саха сирэхаһыакка Күндэйэ нэһилиэгэр «Сырдык Аартык» кэпэрэтиип Таас сайылыгар хонтуруолунай ыам оҥоһуллубутун туһунан суруйбутум.

 

Онно икки ыанньыксыт: “Эһиги ынахтарбытын сиэмэлииргэ хааччыйар Винтик диэн оҕускут сиэмэтэ мөлтөх буолан, ынахтарбыт ороһулаан төрөөтүлэр”,диэбиттэрэ. Ыстатыйа тахсаатын кытары, “Сахагроплем” СБТ салайааччыта Алексей Жирков төлөпүөнүнэн эрийэн: “Сарсын сиэмэлээһин исписэлиистэрин Татьяна Протопопованы, Наталья Неустроеваны Сунтаарга ыытабын. “Сырдык Аартык» кэпэрэтиип салалтатын кытары болдьоһоҥҥун, оҕус сиэмэтин уонна осеменатор үлэтин бэрэбиэркэлээҥ», — диэн сорудахтаабыта.

Мин кэпэрэтиип бэрэссэдээтэлэ Розалия Олимпиевналыын сүбэлэһэн, Татьяна Андреевна уонна Наталья Николаевна кэлбиттэригэр, хамыыһыйа тэрийбиппит. Итиэннэ ”Винтик” сиэмэтин микроскобунан чинчийэн, осеменатор Вера Иванова оҕус сиэмэтин хайдах сылытарын, сиэмэлиирин көрөн-истэн баран, Винтик сиэмэтэ үчүгэй туруктааҕын бигэргэттибит.

Оҕус сиэмэтин микроспобунан чинчийии

Салгыы Таас сайылыкка тиийэн, ыанньыксыттары кытары көрүстүбүт. “Сахаагроплем» исписэлиистэрэ Винтик сиэмэтин хаачыстыбата үчүгэйин, төһө баҕарар ынаҕы буоһатар кыахтааҕын туһунан кэпсээтилэр. Сиэмэлээһин быраабылаларын уонна ирдэбиллэрин быһаардылар, ыам кэмигэр сиэмэлэнэр ынахтары сынньатан, уоскутан баран сиэмэлиир наадатын итиэннэ сиэмэлээн баран, хас да чаас баайан туруорулларын эттилэр. Кэпсэтии түмүгүнэн, ыанньыксыттар ынахтары сиэмэлэнээтин кытары хотонтон таһааран кэбиһэллэрэ, онон оҕус сиэмэтэ ынах буоһуур уорганыгар кыайан тиийбэккэ хаалара ынахтар буоһаабаттарын сүрүн биричиинэтэ буолара ойууланан таҕыста. Чахчы даҕаны оннук. Сайылыкка аттаммыт борооскулар, кунаннар сиэмэлэммит ынахтары “тыбыйаннар”, сиэмэлэрэ тохтон хаалар. Онон Винтик сиэмэтэ мөлтөх диэн боппуруос аны турбат буолла.

Сайылыкка атах тэпсэн олорон кэпсэтии

Кэпэрэтиип хонтуоратыгар “Винтик” диэн племенной оҕус сиэмэтин хаачыстыбата үчүгэйин, ынахтары төһө баҕарар буоһатар кыахтааҕын туһунан туоһулаан хамыыһыйа чилиэннэрэ илии баттаатыбыт. “Сырдык Аартык» кэпэрэтиип ынахтарын төрөөһүнүн хаамыыта үчүгэйин бэлиэтээтибит. От ыйын 1 күнүнээҕи чахчынан, 70,4 % ньирэй ылыллыбыт, өссө эбии 10 ынах төрөөрү сылдьар, онон ньирэй дьыалабыай тахсыыта 70-тан тахса бырыһыан буолар.

Кэпэрэтиип салайааччыта Розалия Олимпиевна:Үүтү элбэтэр туһуттан ынахтарбытын үрдүк хаачыстыбалаах племенной оҕустар сиэмэлэнэринэн буоһатар буолуохпут”, диэн “Сахаагроплем” ыытар үлэтиттэн астынан, салгыы да искусственнай буоһатыыга үлэлэһэр баҕалааҕын биллэрдэ. «Сахаагроплем» исписэлиистэрэ “Ил Тосхол” исписэлииһэ Елизавета Ершованы көрсөн, кэлии сүөһүлэр сиэмэлээһиннэрин уонна буоһааһыннарын туһунан кэпсэтистилэр, улуустааҕы ветеринарнай управление начальнига Дьулустан Михайловы көрсөн, улууска сиэмэлээһин үлэтэ сөпкө ыытылларын бэлиэтээтилэр.

Сунтаартан Борис Потапов, «Саха сирэ»,edersaas.ru анаан

0
0