«Винтаж» ретро-быыстапкаҕа XIX үйэ сүүтүгүн көрүөххүт, урукку духуу дыргыл сытын ылыаххыт, араас үчүгэй киэргэллэри, холбукалары сөҕө, хайгыы көрүөххүт.
А.Е.Кулаковскай аатынан норуоттар доҕордоһууларын дьиэтин үөрэтэр-методологическай киинэ «Винтаж» ретро-быыстапкаҕа ыҥырар. Бу туһунан тустаах тэрилтэ пресс-сулууспата иһитиннэрэр.
Манна эһиги олус интэриэһинэй киэргэллэри, былыргы духуулары, шкатулка арааһын, о.д.а. көрөн сөҕүөххүт. Ол курдук, чаһы арааһын, дыргыл сыыттаах духуулары, урукку пуудара иһиттэрин эһиэхэ анаан өрөспүүбүлүкэтээҕи кэллиэксийэһиттэр түмсүүлэрин салайар Эльвира Николаевна Семенова — Тускулаана көрдөрө аҕалла.
Георгий Иванович Иванов быыстапкаҕа аҕалбыт 1960-1970 сыллардааҕы значоктарын, түөскэ кэтэр киэргэллэри сөҕүөххүт-махтайыаххыт.
Кэллиэксийэһит Дария Дмитриевна Ючюгяева лыахтара болҕомтоҕутун тардыахтара.
Быыстапка биир уратытынан, Варвара Капитоновна Старостина — Абыйа XIX үйэтээҕи сүүтүгэ буолар. Маны сэргэ, кини брошь, суумка, киэргэл, оҕуруо, сэлээппэ, духуу арааһын аҕалбыта эһигини сэҥээрдэрэ саарбахтаммат.
Оттон остуоруйа дойдутун санатар аккырыыккалары, суумкалары, кумааһынньыктары, чуккулары, бүгүдьүүлэри, «Кириэмил» холбуканы Ирина Егоровна Стрекаловская аҕалла. Татьяна Еремеевна Еремеева ридикюлларын, аккырыыккатын сумочкаларын көрүөххүт. Азалия Алексеевна Потапова холбукалара, 1970-с сыллардааҕы клатч-суумката болҕомтону тардыа.
Быыстапкаҕа «Малахит холбукалар» — «Сапфир», «Алмаз», «Аметист» флакон духуулардаах кырасыабай бэйэлээх холбука сэҥээрдиэ. Манныгы «Новая заря» Москва фабриката оҥорор этэ. Маны таһынан, Сэбиэскэй кэмҥэ улахан биһирэбили ылбыт «Красная Москва» духины көрүөххүт. 1925 сыллаахха Бүтүн Арассыыйатааҕы быыстапкаҕа фабрика кыһыл хаалаах духууну дьон-сэргэ көрүүтүгэр-билиитигэр таһаарбыт. «Красная Москва» сүрэҕи ортотунан сүүйэн киирэр дыргыл сыта оччотооҕу кэрэчээнэлэр олус сөбүлээн өр кэмҥэ туттубут духуулара этэ. Сиэдэрэй, мааны, кэрэ, нарын буолууну мэктиэлиирэ, ураты абылыыр күүстээҕинэн ааттанара. Ити курдук, быыстапкаҕа хас биирдии экспонат бэйэтэ тус-туһунан олус интэриэһинэй устуоруйалаах.
Быыстапка А.Е.Кулаковскай аатынан норуоттар доҕордоһууларын фойетыгар кулун тутар 21 күнүгэр диэри ыытыллар. Кэлиҥ, көрүҥ, сэргээҥ.