Бүгүн Нам улууһун Хатырык нэһилиэгин сис ыала Варвара Ивановна уонна Иннокентий Афанасьевич Винокуровтар бииргэ олорбуттара 70 сылын бэлиэтээтилэр.
edersaas.ru
Ытыктанар ыал, тыыл бэтэрээннэрэ 11 оҕону төрөтөн, 28 сиэн, 37 хос сиэн тапталлаах эбээтэ, эһээтэ буолан олороллор.
Иннокентий Афанасьевич 1928 сыллаахха тохсунньу 5 күнүгэр, оттон Варвара Ивановна 1930 сыллаахха сэтинньи 29 күнүгэр Хатырык нэһилиэгэр күн сирин көрбүттэрэ. Иккиэн Аҕа дойду Улуу сэриитин саҕана үлэ үөһүгэр сылдьан Улуу Кыайыыны уһансыбыттара. Тыа хаһаайыстыбатыгар бэриниилээхтик, үтүө суобастаахтык үлэлээн, билигин бочуоттаах сынньалаҥҥа олороллор.
Билигин даҕаны улахан бааһынай хаһаайыстыбаны тутан, салайан олороллор. Хаһаайыстыбаларын уоллара Иннокентий дьаһайар. Туох баар үлэлэрин, олохторун уопутун оҕолоругар иҥэрэн, бары тыа хаһаайыстыбатыгар сыстан улааппыттара. Иллээх-эйэлээх дьиэ кэргэн нэһилиэктэригэр эрэ буолбакка, бүтүн улууска үтүө холобур буолар.
Бүгүн, сэтинньи 8 күнүгэр, Варвара Ивановна уонна Иннокентий Афанасьевич Винокуровтар 70 сыл анараа өттүгэр харахтарынан хайҕаһан, сүрэхтэринэн сөбүлэһэн ыал буолбут кэрэ-бэлиэ күннэринэн улуус баһылыга Юрий Слепцов аатыттан улуус дьокутааттарын Сэбиэтин бэрэссэдээтэлэ Иван Попов кэргэнниилэргэ иккиэннэригэр «Ытык саас» Бочуоттаах бэлиэлэри уонна 70 сыл бииргэ олорбут ыалга 70 тыһыынча солкуобай суумалаах сэртипикээти кытта Улуу Кыайыы 75 сылынан улуус анал бэлиэлэрин туттарда. Сыстыганнаах дьаҥынан сибээстээн, ытык кырдьаҕастары кытта Иван Попов таһырдьа түннүк аттыгар туран төлөпүөнүнэн кэпсэттэ.
⠀
Ытык кырдьаҕастар сиэннэрэ, олохтоох оҕо уһуйаанын иитээччитэ, икки оҕо ийэтэ Матрена Охлопкова иһитиннэрбитинэн, Винокуровтар биир оҕолоро — Санкт-Петербурга, биир — Кыһыл Дэриэбинэҕэ уоннааҕылар бэйэлэрин кытта Хатырыкка олороллор эбит. Сыстыганнаах ыарыыттан харыстаан кырдьаҕастарын кытта оҕолоро уонна сиэннэрэ төлөпүөнүнэн сибээстэһэллэр. Уоллара Иннокентий Иннокентьевич дьонун көрө-истэ сылдьар.
«Күндү дьоммут билигин даҕаны олох үөһүгэр бииргэ сылдьалларыттан, чэгиэн доруобай олороллоруттан киһи үөрэр, дьоллонор, киэн туттар. Винокуровтар дьиэ кэргэттэригэр баҕарабыт кытаанах доруобуйаны, оҕолоргут, сиэннэргит, хос сиэннэргит сылаас сыһыаннарыгар, истиҥ тапталларыгар бигэнэн өссө да уһуннук дьоллоохтук олоруҥ диэн алгыыбыт», — диэн улуус дьаһалтата бэйэтин инстаграмыгар суруйар.
Сиһилии 70 сыл иллээхтик олорор Нам Хатырыгын сис ыалын туһунан «Саха сирэ» хаһыат чэппиэрдээҕи нүөмэригэр ааҕыҥ.
Елена ПОТОЦКАЯ, «Саха сирэ» хаһыат», edersaas.ru
Хаартыска— Нам улууһун МТ инстаграмыттан уонна Матрена Охлопкова тиксэриитэ.