Краснодарскай кыраай дьоруой куоратыгар Новороссийскайга «Буткап» Бүтүн Арассыыйатааҕы футбол бэстибээлигэр Саха сириттэн Прокопий Федоров тириэньэрдээх «Виктория» оҕо футболун кулууба кытынна.
2011 сыл төрүөх уолаттар ортолоругар күрэхтэһии кулун тутар 26-31 күннэригэр буолла. Хас да күн тыҥааһыннаах киирсиилэри быһа эпииринэн көрдүбүт. Саха оҕолоро киин сир оҕолоруттан итэҕэһэ суох оонньоотулар. Ол курдук, үс хамаанда Москваттан, биирдии хамаанда Новороссийскайтан уонна Дьокуускайтан күөн көрүстүлэр. Эрийсиилээх киирсиилэр кэннилэриттэн Москваттан «Легион-1» хамаанда бастакы, Дьокуускайтан «Виктория» иккис уонна Москваттан «Легион-2» үһүс миэстэ буоллулар.
Оонньуу икки түһүмэҕинэн барда. Сүрүн күрэхтэһиини таһынан түргэн оонньууга киирсиилэри ыыттылар. Бу оонньууга биһиги оҕолорбут үһүс миэстэни ылары ситистилэр. Ахсаан тэҥнэһэн, пенальти ыһыылаах-хаһыылаах өрө күүрүүлээх түгэнэ үүммүтүгэр вратарь Илья Пырчу күүстээх уонна эрэллээх тэбиинэн мээчиги боруотаҕа киллэрэн хамаандатын өрө охсон үһүс миэстэҕэ таһаарда. Германия уонна Арассыыйа футболиһа Владимир Бут бэйэтинэн кэлэн күрэхтэһиини көрбүтэ оҕолорго умнуллубат түгэни хаалларда.
Кыра футболистары өрөспүүбүлүкэтээҕи футбол оскуолатын иһинэн номнуо үһүс сылын эрчийэр “Виктория” оҕо футболун хамаандатын тириэньэрин Прокопий Федоровтан күрэхтэһии туһунан кэпсииригэр көрдөстүбүт:
— “Буткап» футбол бэстибээлин тэрээһинэ үрдүк таһымнаахтык ааста. Уолаттарым бары кыһаллан күүстэрин түмэн оонньоотулар. Күрэхтэһиигэ оҕолор маҥнай долгуйаллар этэ. Ол эрээри долгуйууну, толлууну, кутталы умнан күүстээхтик оонньоотулар. Кырдьыгынан эттэххэ, бэйэм даҕаны соһуйдум. Ахсаан тэҥнэһэн турдаҕына пенальтига Илья Пырчу быһаарыылаах голу киллэрбитэ, оонньуу түмүгүнэн “Бастыҥ вратарь” аатын сүктэ. Дима Яковлев диэн уолум сөхтөрөр гына үчүгэйдик оонньообутун хайаан даҕаны бэлиэтиэхпин баҕарабын. Күрэхтэһии бастакы күнүттэн бүтэһик күнүгэр диэри биир даҕаны матчы көтүппэккэ, биирдэ даҕаны сынньаммакка оонньоон хамаанда балаһыанньатын биллэ тупсарда. Бэстибээл түмүгүнэн бастыҥ көмүскээччи аатын ылла. Бука бары төрөппүттэри, чуолаан айаммыт биир сырыытын уйуммут «СРК Регион» ХЭТ генеральнай дириэктэрэ Леонид Николаевич Охлопковка махталбын тириэрдэбин.
Улахан күрэхтэһиигэ иккис миэстэ буолары ситиһэн кырачаан футболистар харахтара уоттанан, кыайыыга кынаттанан бүгүн сарсыарда Дьокуускайга кэллилэр.
Надежда Ильина, edersaas.ru
Хаартыска — «Виктория» архыыбыттан.