Виктория Абрамченко баһаартан кутталлаах кэми аһарыыга сүбэ мунньаҕы ыытта

РФ бырабыыталыстыбатын вице-премьера Виктория Абрамченко иһитиннэрбитинэн, эрэгийиэннэри уонна былаас уорганнарын кытта сүбэ мунньах Сибиир соҕуруу өттүнээҕи сиригэр-уотугар турбут баһаардары кытта ситимнээх.

Кини этэринэн, техногеннай көрүҥнээх баһаардар Красноярскай кыраайга, Кемеровскай, Иркутскай, Новосибирскай, Омскай уонна Курганскай уобаластарга тахсан, нэһилиэнньэлээх пууннар уонна дьон эмсэҕэлээбит.

Вице-премьер “кытарар” 12 киһи олоҕун илдьэ барбытын, 13 киһи балыыһаҕа киирбитин эттэ. Суорума суолламмыттар дьонугар былаас көмөлөһүөхтээҕэ этилиннэ.

Баһаар содулларын аччатыыга үлэ кыалларынан ыытыллыбыт, дьону быстах олордор пууннар аһыллыбыттар. Баһаарынай күүстэр көмөлөрүнэн 7,5 тыһ. тутууга уот тарҕаныытын таһаарбатахтар.
Мунньахха ойуур уотугар сыһыаннаах тиэмэҕэ эмиэ суолта бэрилиннэ.
Саамай уот турар кутталлаах эрэгийиэннэринэн Амур уобалаһа, Приморье кыраайа, Курган уобалаһа, Хабаровскай кыраайа, Красноярскай кыраайа, Еврейскэй автономнай уобалас, Иркутскай уобалас буоллулар
ИСДМ-Рослесхоз ситиминэн Арассыыйа субъектарын сиригэр 10 тыһ. тахса “термоточка” баара бэлиэтэммит.
Вице-премьер өртөөһүҥҥэ эппиэтинэһи кытаатынарарга эттэ. “Саас айылҕаҕа турар баһаардартан 100 бырыһыан кэриҥэ – киһи буруйунан. Бу өртөөһүн, соруйан уматыы, баһаары утары быраабыланы кэһии, сэрэҕэ суохтук туттуу. Киһи дьолоҕойугар түһэрин курдук, ыстараап олохтонуохтаах, 2 тыһыынчалаах ыстараап эрэ буолбакка. Дьалаҕайдык сыһыаннаһыы дьон суорума суолланыытыгар уонна ойуур хаһаайыстыбатыгар улахан хоромньуга тиэрдиэн сөп”, — диэтэ Виктория Абрамченко.
Ону сэргэ мунньах кыттыылаахтара сири бас билээччилэр баһаары бохсууга эппиэтинэстэрин олохтуурга эттилэр. Чуолаан, тыа хаһаайыстыбатыгар анаммыт сирдэри бас билээччилэр манна турбут уоту бохсууга кыттыахтаахтар.
“Биһиги икки күн үс эрэгийиэҥҥэ: Красноярскай кыраайга, Кемеровскай уонна Омскай уобаластарга сырыттыбыт. Бары нэһилиэнньэлээх пууннарга уот куораттар уонна бөһүөлэктэр кыраныыссаларыгар турбут. Тыаттан кэлбэтэх. Ол да буоллар, ойуур баһаарынайдарын федеральнай бөлөхтөрүн бу эрэгийиэннэргэ күүһүрдэргэ эттибит, уот ойуурга куоппатын туһугар. Нэһилиэнньэлээх пууннарга техногеннай баһаардар сүрүн биричиинэлэринэн уот линиятын быстыылара, подстанцияларга уот арахсыыта (замыкание) буолбуттар. Эрэгийиэннэр баһылыктара маннык уот линияларын суһаллык араарарга этии киллэрдилэр”, — диэтэ айылҕа ресурсаларыгар уонна экологияҕа миниистирэ Александр Козлов эттэ.

РФ Бырабыыталыстыбатын саайтыттан
Бэлэмнээтэ Женни Стрюкова