Виктор Лебедев: «Тустууктарбыт Аан дойду кубогар ситиһиилээхтик кытталлара буоллар»

Бөлөххө киир:

Кулун тутарга Дьокуускайга ыытыллар көҥүл тустууга Аан дойду кубогын чэрчитинэн пресс-кэмпириэнсийэҕэ Виктор Лебедев суруналыыстар ыйытыктарыгар хоруйдаата.

«Мин Арассыыйа сүүмэрдэммит хамаандатыгар киирэн Аан дойду кубогар үстэ кыттыбытым. Москваҕа 2010 сыллаахха уонна Махачкалаҕа 2011 сыллаахха ыытыллыбыт кубоктарга кыайбыппыт. Онтон 2014 сыллаахха Лос-Анджелеска буолбут Аан дойду кубогар хамаандабыт иккис миэстэ буолбута. Хамаанданан күрэхтэһэр — улахан эппиэтинэс. Хас биирдии тустуукка улахан эппиэтинэс сүктэриллэр, мантан хамаанда түмүгэ тутулуктаах. Мин 57 киилэ ыйааһыҥҥа күрэхтэһэр буоламмын, бастакынан тустааччыбын. Мин хайдах саҕалыырым элбэҕи быһаарара», — диэн Виктор Лебедев ахтан ааста.

Оттон «Спорт Якутии» таһаарыы кэрэспэдьиэнэ «кимниин тустубуккун умнубаккыный?» диэн ыйыппытыгар, Виктор Николаевич иранец Хасан Рахимины кытта тустубутун эттэ: «2011 сыллаахха Дагестаҥҥа уонна 2014 сыллаахха Америкаҕа финалга Рахимины кытта тустубутум. Иккиэннэригэр кыайбытым. Ол эрээри, Лос-Анджелеска кыайыы бүтэһик сөкүүндэлэргэ кэлбитэ, онон ол түгэни ордук өйдөөн хаалбыппын».

Манна Виктор Лебедев Аан дойду кубога тустууктарга улахан суолталаах турнир буоларын бэлиэтээтэ: «Аан дойду кубога бэйэтэ туспа историялаах турнир, кыайбыт хамаанда аан дойду тустуутун историятыгар киирэр. Бу турнирга аҕыс күүстээх хамаанда талыллан кэлэр. Ааспыт күһүн Будапешка ыытыллыбыт аан дойду чөмпүйэнээтин бастыҥнара кэлиэхтэрэ».

Маны таһынан суруналыыстар саха тустуутун оскуолатын бэрэстэбиитэллэриттэн кимнээх хамаандаҕа киириэхтэрин сөбүн чопчуластылар. Онуоха Виктор Николаевич: «Бэҕэһээ Арассыыйа сүүмэрдэммит хамаандатын сүрүн тириэньэрин Дзамболат Тедеевы кытта төлөпүөнүнэн кэпсэппитим. Арассыыйа сүүмэрдэммит хамаандатын туһунан кэпсэппиппит, састаап кулун тутар саҕаланыыта биирдэ биллэр. Бүтэһик күрэхтэһиилэргэ бэйэлэрин үчүгэйдик көрдөрбүт уолаттарбыт Арыйаан Тютрин уонна Эдуард Григорьев хамаандаҕа киириэхтэрин сөп дии саныыбын. Кубокка ситиһиилээхтик кыттан кыайдахтарына, мин олус киэн туттуом этэ», — диэтэ.

http://www.yakutskworldcup2019.org/ru/ саайтан тылбаас,

edersaas.ru