Бу күннэргэ Красноярскай куоракка Иван Ярыгин аатынан турнир буола турар. Элбэх киһи «күөх экран” иннигэр ону маныыр.
Саха сириттэн ыалдьа диэн ааттаан буола турар сиригэр тиийбэттэр да аҕыйаҕа суохтар. Олор ортолоругар биллиилээх ырыаһыппыт Лэгэнтэй баар, кини тустууктарбыт туһугар ис-сүрэҕиттэн ыалдьан хаһыытыыра батсаабы тилийэ көттө.
Саха сирин тустууктарыттан Виктор Рассадин турнир полуфиналыгар кыайан, финалга таҕыста. Онон «харахпыт уутун” син туора соттор кыахтанныбыт. Атын уолаттарбыт хотторуу хомолтотун биллилэр.
Уолбут Виктор Дьобуруопа чөмпүйүөнэ Курбан Ширяевы 7:6 очукуонан кыайан, умса баттаата. Салгыы Казахстан бөҕөһө Сырбаз Талгаттыын кииристэ уонна 12:1 очукуонан кыайыыны ситистэ. Ити кэннитэн кэлэр хапсыһыыга уолбут Красноярскай бөҕөһүн Усман Шахгиреевы 6:1 ахсаанынан кыайда. Онон итинник кирбиини ааһан, Викторбыт финалга тахсары ситистэ. Онно Кабардино-Балкарияттан аан дойдутааҕы кылаастаах успуорт маастара Анзор Закуевы кытта хапсыһыа. 70 кииилэҕэ диэри ыйааһыҥҥа финал бүгүн, тохсунньу 28 күнүгэр, биһиги чааспытынан киэһэ 20:15 ч. «Спорт без границ» ютуб ханаалыгар көрүөххүтүн сөп.