«Хамаандабыт настарыанньата үчүгэй, күрэхтэһэргэ бэлэммит. Мин санаабар, биһиги хамаандабыт сыалын-соругун ордук хос хатылыыр наадата суох. Бары бэркэ билэбит, биһигиттэн тугу күүтэллэрин. Хамаандабыт састаабын сүрүн тренер Дзамболат Тедеев Сочига хомуур кэмигэр кулун тутар 8 күнүгэр биллэрбитэ. Сахалартан мин уонна Арыйаан Тютрин киирдибит. Хас даҕаны түһүмэхтээх эрчиллиини, күрэхтэһиилэри аастыбыт. Болгарияҕа норуоттар икки ардыларынааҕы турнирга кыттыбыппыт, ол түмүгүнэн хамаанданы талбыттара. Маны таһынан, хас биирдии ыйааһыҥҥа иккилии бөҕөстөөхпүт, ханнык киирсиигэ ким күрэхтэһэрин сүрүн тренер быһаарыаҕа. 65 киилэҕэ диэри ыйааһыҥҥа мин уонна Европа чөмпүйүөнэ Гаджимурад Рашидов баарбыт. Хас биирдии хамаандаҕа киирбит тустуук турнирга күрэхтэһэр улахан баҕалаах. Бэйэм күүспүн күүстээх утарсааччылары кытта холоһон көрүөхпүн баҕарабын. Холобура, Японияттан аан дойду чөмпүйүөнүн Такуто Отогуроны кытта. Ол эрээри, кини доруобуйата мөлтөөн, Дьокуускайга сатаан кэлбэтэх эбит. Ол да буоллар, мин тустар ыйааһыммар конкуренция күүстээх«, — диир Виктор Рассадин.
СИА.