«ОДьКХ» ГУП генеральнай дириэктэрэ Виктор Омуков «Коммункомплектация» Дьокуускайга уонна Маҥан бөһүөлэгэр баар хочуолунайдарыгар сылдьан, үлэ хайдах бара турарын билистэ.
Филиал үс учаастактаах: «Аэропорт», «ДСК» уонна Маҥан бөһүөлэгин хочуолунайдара. Итини тэҥэ, аварийнай-диспетчерскэй сулууспа, тиэхиньикэ сыаха, материальнай-техническэй база киирэллэр.
Учаастакка сайын устата үс хочуолга хапытаалынай өрөмүөнү ыыппыттар, 60 куб м иэннээх тымныы уу икки емкоһын уларыппыттар уонна гааһы учуоттуур, ааҕар анал комплексы таҥан туруорбуттар. Итини тэҥэ, 672 м уһуннаах ититэр ситими, 590 м уһуннаах уунан хааччыйар ситими уонна 237 м уһуннаах канализацияны саҥардан уларытан биэрбиттэр. «Коммункомплектация» дириэктэрэ Артур Басман ити үлэлэр сайын устата былаан быһыытынан ыытыллыбыттарын, ылыныллыбыт болдьоххо түмүктэммиттэрин туһунан кэпсээтэ.
Оробуочай бөлөх бастаан «Аэропорт» хочуолунайыгар сырытта. Бу эбийиэк «Дьокуускай» авиапордун, «Якутия» уонна «Полярные авиалинии» хампаанньалар, 3 №-дээх куораттааҕы полиция отделын дьиэлэрин итиинэн хааччыйар. Манна 14,5 км уһуннаах ититэр ситим туһаныллар.
22 МВт кыамталаах «ДСК» хочуолунайа оборуонаҕа министиэристибэтин эбийиэктэрин, чааһынай дьиэлэри итиинэн хааччыйар. «ОДьКХ» ГУП дириэктэрэ Виктор Омуков итиинэн хааччыйар эбийиэктэргэ сылдьан, энергияны көдьүүстээхтик туһанар оборудованиелары көрдө-иһиттэ.
Салгыы Маҥан бөһүөлэгэр тиийэн, социальнай хабааннаах эбийиэктэри, дьиэлэри итиинэн хааччыйар 18 МВт кыамталаах үс хочуолунайга сырыттылар. Учаастак көрүүтүгэр-истиитигэр икки уу собуора уонна 12,5 км уһуннаах ититэр ситим бааллар.
Тустаах хампаанньа генеральнай дириэктэрэ Виктор Омуков оробуочай сырыы түмүгэр филиалларга сүрүн оборудованиелары уонна инженернэй ситимнэри саҥардан уларытыы хочуолунайдары көрөн-харайан үлэлэтиигэ ороскуот лаппа кыччыырын, итиинэн хааччыйыы хаачыстыбыта тупсарын уонна, саамай сүрүнэ, исписэлиистэр үлэлииллэригэр куттал суох буоларын туһунан тоһоҕолоон бэлиэтээтэ.
Санатар буоллахха, «Коммункомплектация» ааспыт биэс сыл устата 20 км уһуннаах ититэр, 11 км уһуннаах ууну хааччыйар ситимнэри уонна 0,6 км уһуннаах канализацияны саҥардан оҥордо.
Александр ТАРАСОВ, «Саха сирэ» хаһыат, edersaas.ru