Биир мандаттаах Таатта-Томпо быыбардыыр уокуруктан «Биир ньыгыл Арассыыйа» баартыйа хандьыдаата — биллиилээх спортсмен, көҥүл тустууга аан дойду икки төгүллээх чөмпүйүөнэ Виктор Лебедев быыбарга кыттыбыттар 57,18 бырыһыан куоластарын ылан, Ил Түмэн дьокутаатынан талылынна.
Виктор Лебедев быыбарга киниэхэ итэҕэйэн куоластаабыт дьоҥҥо махтанна.
Ытыктабыллаах Таатта уонна Томпо улуустарын олохтоохторо!
Балаҕан ыйын 9 күнүгэр буолбут быыбарга миэхэ итэҕэйбит, эрэммит, куоластарын биэрбит дьоҥҥо истиҥ махталбын тиэрдэбин. Быйыл саас уонна күһүн хас биирдии нэһилиэги кэрийэн, дьону-сэргэни кытта кытта көрсүһэн, кыһалҕаларын, баҕа санааларын иһиттим. Эһиги миэхэ итэҕэлгитин түһэн биэриэм суоҕа диэн эрэннэрэбин.
Иннибитигэр элбэх үлэ күүтэр. Биэс сыл түргэнник ааһыа, туруоруммут сыалларбын олоххо киллэрэр баҕа санаалаахпын. Өрүү маннык түмсүүлээх, биир санаалаах буолуоххайыҥ.
Барыгытыгар ис сүрэхпиттэн доруобуйаны, күүстээх санааны, ситиһиилэри баҕарабын!
Ытыктабылы кытта, Виктор Лебедев.