Уопсастыба

Виктор Лебедев Таатта балыыһатыгар көмөлөстө

Хоруона хамсыга күһүҥҥү тымныылары кытары тэҥҥэ «хардыытын» кэҥэтэн барда. Дьаҥҥа сутуллааччы ахсаана өрөспүүбүлүкэ үрдүнэн, хомойуох иһин, эмиэ күннэтэ элбээн эрэр.

Кутталлаах дьаҥ сабардаан турар кэмигэр, ханна да медиктэр ыарыыны утары охсуһуу инники күөнүгэр сылдьаллар. Маныаха ыксаллаах быһыыны-майгыны уҕарытар, намтатар туһуттан, Таатта улууһун мэдиссиинэ эйгэтин үлэһиттэригэр,  дьаҥтан харыстыыр, бохсор сириэстибэлэри уонна мааскалары эбии аҕалан бүгүн туттардылар.

Бу уустук кэмҥэ уочараттаах көмө быһыытынан Таатта улууһун киин балыыһатын кэлэктиибин үлэһиттэригэр маннык аҕалан туттарыылара дьон-сэргэ туһугар кыһамньыны, ис сүрэхтэн үтүөнү баҕарары кэрэһилиир. Оттон үтүө быһыы сүргэни өрө көтөҕөр, киһиэхэ күүһү-уоҕу биэрэр, эрэли улаатыннарар.

Норуот дьокутаата, биллиилээх улахан спортсмен Виктор Лебедев 40 лиитэрэ антисептиги, үс тыһыынча маасканы Ытык-Күөлгэ, 20 лиитэрэ антисептиги уонна икки тыһыынча маасканы  Уус Тааттаҕа анаан ыытта. Таатталар, мэдиссиинэ эйгэтин үлэһиттэрэ аан дойдуга тарҕаммыт дьаҥы утары охсуһууга тус көмөтүн, өйөбүлүн иһин дьокутаакка ис сүрэхтэриттэн махтал тылларын тиэрдэллэр.
— Маннык көмөнү Виктор Николаевич иккис төгүлүн онорор. Бу билиҥҥи кэмҥэ олус наадалаах, туһааннаах көмө. Өйөбүлү ылбыт дьон наһаа үөрэн тураммыт, Виктор Николаевичка ис сүрэхпититтэн махтанабыт уонна инникитин да дьоҥҥо-сэргэҕэ көмөлөһө туруо диэн эрэнэбит, — диэтэ улуустааҕы киин балыыһа эпидемиолог-бырааһын көмөлөһөөччүтүн э.т. Афанасий Васильевич Никитин.

0
0
Telegram @edersaas20

Добавить комментарий