Атах тэпсэн олорон сэһэргэһиигэ, өрөспүүбүлүкэ баһылыга Айсен Николаев, киһи ылбыт идэтинэн, ол эрэ хайысханан олоҕун тухары үлэлиэхтээҕин туһунан өйдөбүлгэ сөбүлэспэтин биллэрдэ. Дьаралык ыйаабакка, сайдыы туһугар соруктаныахха диэн эттэ. Маны сэргэ, 2024 сылга Сахабыт сиригэр ыытыллар ахсыс «Азия Оҕолоро” оонньууларга бэлэмнэниэхтээхпитин тоһоҕолоото.
—Спортсмен буоллуҥ да, олоҕуҥ тухары ити эрэ эйгэҕэ үлэлиэхтээххин диэни өйдөөбөппүн. Владимир Путин аҕыйах хонуктааҕыта аатырбыт кикбоксер Бату Хасиковы Калмыкия салайааччытын эбээһинэһин толорооччунан анаата. Тоҕо эрэ, калмыктартан ким даҕаны сөбүлээбэтэҕин биллэрбэтэ, төттөрүтүн, бары биһирииллэрин биллэрдилэр, дьэ, аны балаһыанньабыт тупсуо дииллэр. Виктор Лебедев 2016 сылтан куорат дьаһалтатыгар үлэтин саҕалаабыта. Инньэ диир буоллаххытына, мин физик үөрэхтээхпин. Оччоҕуна мин ити эрэ хайысхаҕа үлэлиэхтээх этим дуо? Онон дьоҥҥо дьаралык ыйыыртан туттунуохха.
Павел Пинигин, баҕар, урут алҕаһаабыта буолуо, баҕар, алҕаһаабатаҕа буолуо. Кини билигин биһиги ортобутугар соҕотох тыыннаах Олимпиада кыайыылаҕа. Кини Саха сирин эрэ буолбатах, дойду киэн туттуута буолар. Сурах-садьык хоту киһини баһааҕырдар сыыһа. Кинини билигин өйүөххэ наада. Мин санаабар, Павел Павлович төһө да күүстээх санаалаах буолбутун иһин, киниэхэ дьон-сэргэ өйөбүлэ эмиэ баар буолуохтаах.
Аан дойду Кубогын үрдүк таһымҥа ыыттыбыт. Санатыам этэ, 1973 сыллаахха Роман Дмитриев уонна Павел Пинигин ССРС сүүмэрдэммит хамаандатын кытта Кубогы ылбыттара. Быйыл, 46 сыл буолан баран, Арыйаан Тютрин уонна Виктор Рассадин бу ситиһиини хатылаатылар. Биһиэхэ Ненад Лалович аан дойду чөмпүйэнээтин ыытыаххытын сөп эбит диэн этии киллэрбитэ. Онон биһиги ааҕынан, кыахпытын суоттанан баран, хоруйбутун биэриэхтээхпит. Аны биһиги 2024 сылга Сахабыт сиригэр ыытыллар ахсыс «Азия оҕолоро” оонньууларга бэлэмнэниэхтээхпитин умнуо суохтаахпыт.
Родион КРИВОГОРНИЦЫН, «Саха сирэ» хаһыат, edersaas.ru