Көҥүл тустууга Аан дойду икки төгүллээх чөмпүйүөнэ Виктор Лебедев Томпо Тополинайыгар баһаарга эмсэҕэлээбит дьоҥҥо 500 тыһ.солк. көмөлөстө. Санатан эттэххэ, Лебедев былырыын ахсынньы ыйга улахан спортан барбыта. Билигин туох-хайдах дьарыктаах олорорун туһунан News.Ykt.Ru сайта биэрбит интервьютун таһаарабыт.
Виктор Лебедев:
— Норуоппар туһалаах киһи буолуохпун баҕарабын. Хоту олох хайдах курдук ыараханын бэйэбинэн билэбин. Спордунан дьарыктанар эрдэхпинэ ыраах хотугу нэһилиэк дьонугар-сэргэтигэр үөрүүнү бэлэхтиирбинэн киэн туттарым. Инникитин дьиҥнээх дыьаланан туһаны аҕалыахпын баҕарабын.
— Соторутааҕыта эн төрөөбүт Тополинайгар улахан баһаар буолбута. Элбэх кыбартыыралаах дьиэ уокка былдьаммыта.
— Ол саҥа дьиэ этэ, дьон соторутааҕыта көспүтэ. Тохсунньу ортото алдьархай буолбута: уон икки ыал дьиэтэ суох хаалбыта, туох баар маллара, докумуоннара, бултуур тэриллэрэ умайбыта. Дьолго, сиэртибэ суоҕа. Мин маҕаһыыным аатыттан 1 мөл. аҥарынан бу ыалларга көмөлөспүтүм. Инникитин маҕаһыыммар киирбит харчы сороҕо аһымал дьыалаҕа барарын курдук былаанныыбын. Томпо улууһун баһылыга кэскиллээх эдэр киһи. Итинник эрчимнээх дьон үлэлиириттэн үөрэбин. Оройуоммут сайдыытыгар элбэх саҥа санаалааҕа астык. Эмсэҕэлээбит ыалларга харчы ыытарбар кинилиин сибээстэспитим.
— Улахан спортан барбытыҥ кэннэ, олоҕуҥ хайдах уларыйда?
— Ахсынньыга миигин улахан спортан атаарарга оройуоннартан элбэх киһи кэлбититтэн долгуйбутум уонна дьолломмутум. Норуоппут олус патриоттуу санаалааҕыттан уонна сомоҕотуттан үөрбүтүм. Түгэнинэн туһанан, ыалдьааччыларбар махтанабын. Спордунан дьарыктанар оҕолоро, аймахатара, чугас дьоно ситиһиилээх буоллуннар. Бары чөмпүйүөн да буолбатар, кылаабынайа, үтүө дьон буола улааттыннар.
— Күнүҥ хайдах ааһарый? Уруккуҥ курдук күн аайы дьарыктанаҕын дуо? Күрэхтэһиилэри суохтуугун?
— Билигин күннээҕи дьыалам олус элбэх. Күрэхтэһиилэри куруук ахтыаҕым, тоҕо диэтэр тустууну олус таптыыбын, уопсайынан, спорду. Ол эрээри, спортан олох тэйдим диэбэппин, спорка баарбын, спортсменнарга көмөлөһүөм. Эдэр спортсменнар мин ситиһиибинээҕэр элбэх үрдэли дабайалларыгар баҕарабын. Биһиги ыччаппытыттан аан дойду таһымыгар таҕыстахтарына, мин олус дьоллонуом уонна киэн туттуом.
— Эдэртдэртэн кими чорботоҕунуй? Уолаттарга көмөлөһөҕүн дуо?
— Тустууктартан Виктор Рассадин, Дмитрий Аксёнов, Ариан Тютрин үчүгйэдэр. Кинилэри кытта билсэбин, үбүнэн көмөлөһөбүн. Ааспыт Арассыыйа чөмпүйэнээтигэр үчүгэй көрдөрүүлээх этилэр. Эдэрдэртэн өссө Ньургун Скрябиҥҥа, Герман Устиновка эрэнэбин. Тренердэрин кытта куруук билсэбин.
News.Ykt.Ru
Хаартыска: ЯСИА, «Саха» НКИХ.
Николай Попов, «Саха сирэ» хаһыат, edersaas.ru