Ил Түмэн Экономикаҕа, инвестицияҕа, промышленнай бэлиитикэҕэ, предпринимательствоҕа, туризмҥа уонна инфраструктураны сайыннарыыга сис кэмитиэтин бэрэссэдээтэлэ Виктор Федоров этэринэн, «АЛРОСА» хампаанньа блокируйдуур акцияларын тыыттарбат, оттон «АЛРОСА-Ньурба» акцияларын, билигин ырыынакка үчүгэй сыанаҕа турар кэмигэр, атыылыыр ордук.
Аграфена Кузьмина, «Саха сирэ» хаһыат, https://edersaas.ru
Санатан эттэххэ, олунньу 2 күнүгэр РФ бырабыыталыстыбата Россия баайын-дуолун 2017-2019 сс. приватизациялыыр былаанын бигэргэттэ. Онно «АЛРОСА» хампаанньа акцияларыттан 8 % атыылыыр туһунан ыйыллыбыт. Россия илдьэ сылдьар судаарыстыбаннай бакыата 29 % + 1 диэри кыччыахтаах, Саха сирин уонна муниципальнай тэриллиилэр өлүүлэригэр эмиэ көннөрүү барыахтаах диэн этиллэр.
Дьокутаат Виктор Федоров «АЛРОСА» хампаанньа региоммут социальнай-экономическай сайдыытыгар улахан оруолу ыларын бэлиэтээн туран, билигин акциялары атыыга таһаартарбат туһугар үлэлэһиэххэ наадатын этэр.
— Өскөтүн өрөспүүбүлүкэ бүддьүөтүгэр киирэр нолуоктар улахан аҥаардарын (75 %) үс хампаанньа, «АЛРОСА», «Сургутнефтегаз», «Транснефть», төлүүр буоллаҕына, баһыйар үгүһэ «АЛРОСА»-ттан киирэр. Ону сэргэ хампаанньа дуогабар түһэрсэн «Үүнэр көлүөнэ фондатын» нөҥүө өрөспүүбүлүкэ сайдыытыгар сылын аайы харчы ыыта олорор, «Азия оҕолоро» спортивнай оонньууга генеральнай спонсор буолар. Онон биһиги бу хампаанньаттан ытыс соттон хааллахпытына, бүддьүөппүт аҥаарын сүтэриэхпитин уонна инники сайдыыбытыгар оҕустарыахпытын сөп, — диэн бэлиэтиир Виктор Николаевич.
Блокируйдуур акцияны (25 % + 1), ол эбэтэр судаарыстыба хампаанньаҕа сабыдыаллыыр бакыатын харыстыыр туһуттан 2003 сыллаахха сокуон тахсыбыта.
«Билигин 25 % + 1 акциябытын уонна муниципальнай тэриллиилэргэ баар 8 % сокуонунан бары өттүнэн хайынан олоробут. Билигин баар сокуон Саха сирин интэриэһин бары өттүттэн көмүскүүр. Онон өрөспүүбүлүкэбитигэр чөл туруктаах, бигэ тирэхтээх экономиканы оҥоро иликпитинэ, «АЛРОСА» хампаанньа акцияларын атыылыыр туһунан боппуруос туруо суохтаах», — диэн этэр дьокутаат.
Аграфена Кузьмина, «Саха сирэ» хаһыат, https://edersaas.ru