Олимпийскай оонньуулар алта төгүллээх чөмпүйүөннэрэ Виктор Ан шорт-треккэ салгыы күрэстэһиэҕин туһунан иһитиннэрдэ.
Виктор Ан (Ан Хён Су) мантан антах эрчиллиитин сөргүтүөҕүн, дойду сүүмэрдиир күрэхтэһиилэрин ааһан, 2022 сылга Пекиҥҥэ ыытыллар кыһыҥҥы Олимпиадаҕа Арассыыйа аатыттан кыттар баҕалааҕын туһунан эттэ. Соҕуруу Корея The Kyunghyang Shinmun таһаарыыта отут үс саастаах Виктор Ан: “Мин дойдум – Арассыыйа, Соҕуруу Кореяттан күрэстэһэр быраабым суох”, — диэн эппитин киэҥ истиигэ таһаарда.
Санатан эттэххэ, 2018 сыл күһүнүгэр Виктор Ан улахан спортан тохтуурун туһунан иһитиннэрэн турар.
Ыспыраапка
Виктор Ан – Арассыыйа спордун үтүөлээх маастара (2013). Шорт-треккэ Олимпийскай оонньуулар алта төгүллээх чөмпүйүөннэрэ, аан дойду алта төгүллээх абсолютнай чөмпүйүөнэ (2003-2007, 2014), аан дойду сүүрбэ төгүллээх чөмпүйүөнэ, аан дойду Кубогын аҕыс төгүллээх кыайыылааҕа.
2011 сыл ахсынньытыгар диэри Соҕуруу Корея аатыттан күрэхтэспитэ.
Роман Попов
Хаартыска Интэриниэттэн ылылынна.