Шорт-треккэ Олимпийскай оонньуулар алта төгүллээх чөмпүйүөннэрэ Виктор Ан улахан спортан тохтоото уонна Арассыыйаттан Соҕуруу Кореяҕа төннөр буолла. Бу туһунан Арассыыйа хаҥкыга федерациятын бэрэсидьиэнэ Алексей Кравцов “Интерфакска” иһитиннэрдэ.
Арассыыйа гражданствотын ылбыт Виктор Ан манна хаалан тириэньэринэн үлэлииргэ этии киллэрбиттэрин, ылыммата. Онтун кини оҕото Кореяҕа үөрэниэҕин баҕарарынан быһаарбыт.
Билэргит курдук, аан дойдутааҕы олимпийскай кэмитиэт 32 саастаах Виктор Ан Пхенчханнааҕы Олимпиадаҕа кыттарын бобон турар. Туохтан итинник быһаарыы ылыммытын МОК спортсмеҥҥа быһаарбатаҕа.
Виктор Ан 2011 сыллаахха Арассыыйа гражданинынан буолбута. Кини бастакы үс кыһыл көмүс мэтээлин Соҕуруу Кореяҕа буолбут 2006 сыллааҕы Олимпиадаҕа ылбыта. Сочитааҕы Олимпиадаҕа Арассыыйа аатыттан кыттан эмиэ үс төгүл пьедестал үрдүкү үктэлин дабайбыта. Маны тэҥэ Виктор Ан аан дойду 18 төгүллээх чөмпүйүөнүнэн буолар.
Роман Попов, edersaas.ru
Хаартыска Итэриниэттэн ылылынна.