Бүгүн алтынньы 12 күнүгэр саҥа талыллыбыт Судаарыстыбаннай Дуума бастакы мунньаҕа саҕаланна. Бу мунньахха депутаттар бэрэссэдээтэллэрин талыахтара.
Мунньаҕы “Биир ньыгыл Арассыыйа” баартыйаттан талыллыбыт депутат Валентина Терешкова арыйда. Бүгүҥҥү мунньахха депутаттар Судаарыстыбаннай Дуума бэрэссэдээтэлин уонна кини солбуйааччыларын куоластаан талыахтара.
Билиҥҥи туругунан, парламентарийдар Судаарыстыбаннай Дуума счетнай хамыыһыйатын, кылгас кэмҥэ үлэлиир хамыыһыйаны, секретариаты бигэргэттилэр. Ону таһынан Судаарыстыбаннай Дуума күһүҥҥү сессиятын үлэтин туһунан кэпсэттилэр. Бу сыл бүтүөр диэри депутаттар нэдиэлэ аайы иккилии мунньаҕы ыытыахтара. Ый бүтэһик нэдиэлэтигэр уокуруктарынан үлэлиэхтэрэ.
Санатан эттэххэ, быйылгы Судаарыстыбаннай Дуумаҕа “Биир ньыгыл Арассыыйа” – 324 мандааты, “КПРФ” – 57, “Сиэрдээх Арассыыйа-кырдьык туһугар” – 27, “ЛДПР” – 21, “Новые люди” – 13, “Гражданскай платформа”, “Партия роста”, “Родина” – 1, ону сэргэ бэйэ кандидатуратын туруоруммут депутаттар биэс миэстэни ыллылар.
Судаарыстыбаннай Дуумаҕа биэс фракция баар. “Биир ньыгыл Арассыыйа” фракциятын Владимир Васильев, “КПРФ” – Геннадий Зюганов, “ЛДПР” – Владимир Жириновскай, “Сиэрдээх Арассыыйа-кырдьык туһугар” – Сергей Миронов, “Новые люди” – Алексей Нечаев салайыахтара.
Аграфена КУЗЬМИНА