«Сэрии тулаайаҕа» ырыаҕа видеоролик устан, Госдуума дьокутаатын махталын ыллылар
Быйыл, Улуу кыайыы 75 сылынан, дойду, өрөспүүбүлүкэ үрдүнэн, Аҕа дойду Улуу сэриитин дьоруойдарын, хорсун буойуннары, Үлэ фронун, тыыл бэтэрээннэрин ааттарын үйэтитиигэ элбэх, араас хабааннаах тэрээһиннэр, дьаһаллар ыытыллаллар.
Олортон биирдэстэринэн, саха норуодунай артыыһа Анастасия Варламова «Сэрии тулаайаҕа» диэн ырыатын тылыгар уонна матыыбыгар видеоролигы устууга Судаарыстыбаннай Дуума дьокутаата Федот Тумусов биллэрбит куонкуруһа буолла.
Куонкуруска өрөспүүбүлүкэ олохтоохторо көхтөөхтүк кытыннылар. Оттон Анастасия Николаевна Варламова биир дойдулаахтара – Мэҥэ Хаҥалас дьоно-сэргэтэ, биллэн турар, бу куонкуруска кыттары ытык иэстэрин курдук ылыннахтара. Холобур, II Тыыллыма нэһилиэгин Хаатылыма сэлиэнньэтин олохтоохторо куонкурус биллэриллибитин истээт, тута интэриэһиргээн, кыттарга быһаарыммыттара. Манна көҕүлээччинэн Фаина Петровна Спиридонова дириэктэрдээх Хаатылыматааҕы Култуура киинэ буолла. Кулуупка култуурунай-тэрийэр үлэҕэ эппиэттээх Клара Викторовна Слободчикова этии киллэрэн, бэйэтэ оператордаан, бу видеоролик уһулунна.
—Кыайыы 75 сылыгар анаан, биһиги биир дойдулаахпыт, Мэҥэ Хаҥалас улууһа, Саха сирэ барыта киэн туттар, өйдүүр-саныыр мелодиспыт Анастасия Варламова «Сэрии тулаайаҕа» диэн ырыатыгар видеоролик уһулан, куонкуруска кытынныбыт итиэннэ ол түмүгүнэн “Сиэрдээх Арассыыйа” партияттан Госдуума дьокутаата Федот Семенович Тумусовтан Махтал сурук уонна мэтээл тутан үөрдүбүт. Махталбыт улахан.
Бэрт дириҥ ис хоһоонноох куонкурус буолла. Кыттыбыт дьон уопут бөҕөтүн ыллыбыт. Бэрт сэргэх күннэр аастылар. Улуу Кыайыы өрөгөйдөөх сылыгар сэмэй кылаат уурулунна диэххэ сөп.
Бу тиэмэ билигин олус тоҕоостоох. Ол иһин, урут хаһан да видеоролик устубатах, роликка да аан бастакытын уһуллубут дьон, кыттаммыт олус үөрдүбүт. Тоһоҕолоон эттэхпинэ, бу бэлиэ даатаҕа туох эрэ бэйэбит кылааппытын киллэрсибит киһи, диэн баҕа санаа баһылаан, кытынныбыт. Дьоммут, оҕолорбут бастакы холонуулара буолан олус долгуйаллар этэ, ол да буоллар, бэйэлэрин идиэйэлэрин, бу ырыаны ким хайдах истэринэн, ылынарынан, санааларын үллэстэн, бары бииргэ буоллубут, үлэлээтибит.., — диир Клара Слободчикова.
Роликтарын эпизодтарынан, холобур, сэрии иннинээҕи дьоллоох оҕо саас, ампаарын иннигэр хотуурун таптайа олорор аҕалара, элбэх оҕолоох саха ыалын сибэккинэн симэммит тиэргэнигэр уһуллубута. Онтон кэлэр эпизодка, Эбэҕэ киирэн, оҕолор аҕаларын уоттаах сэриигэ атаараллара көстөр. Күндү киһилэрэ Куула устун хааман иһэрин ыччаттара – кыргыттара, уолаттара ыраахха диэри атаара көрөн хаалаллар… Онтон ампаар дьиэ иннигэр олорон сэрии тулаайаҕа-оҕолор аҕаларын тиһэх суругун ааҕаллар… Саха саллаатын — аҕаларын аатын дьоһуннаахтык ааттата туруохтарыгар киһи кинилэргэ эрэниитэ ырыа суолтатын өссө кэҥэтэн, итэҕэтиилээхтик бэриллэр.
Видеороликка Хаатылыма олохтоохторо, Аҕа дойду Улуу сэриитин бэтэрээнин уола Николай Григорьев аҕа оруолугар, Аҕа дойду Улуу сэриитин бэтэрээнин хос сиэнэ Евгения Павлова ийэ оруолугар уонна Хаатылыма оскуола-саадын выпускниктара Данил Павлов, Лилиана Спиридонова, Вася Саввин, Өркөн Харитонов, детсад иитиллээччитэ Сахая Федорова оҕолор оруолларын, бастакы холонуу диэтэххэ, бэрт айымньылаахтык толороллор.
—Оҕолор олус маладьыастар, көхтөөх дьон! Кинилэр бэрткэ кыһаллан-мүһэллэн, баҕаран туран оонньоон, барыбытын да сэргэхситтилэр, түмтүлэр. Маннык дьаһалларга кыттар наада. Инникитин, оборудованиеҕыт тубустаҕына, өссө үчүгэй сюжеттары, килииптэри устуоххут. Өссө уопутуран иһиэххит буоллаҕа, айар бөлөххө ситиһиилэри баҕарабын!, — диэтэ саҥа видеоролигы билиһиннэрии кэмигэр педагогическай үлэ бэтэрээнэ, СӨ үөрэҕириитин үтүөлээх үлэһитэ Анастасия Афанасьевна Григорьева.
Бу курдук, Улуу Кыайыы 75 сылын дьоһуннаахтык бэлиэтииргэ Сахабыт сирин хас биирдии нэһилиэгэ, хас биирдии дьиэ кэргэнэ бэйэтин сэмэй кылаатын киллэрэр.
https://www.instagram.com/tv/CBu0wCKg8wc/?igshid=dsxw615oivub
Хаартыскаларга: “Сэрии тулаайаҕа” видеоролигы устуу оробуочай түгэннэриттэн.
Татьяна МАРКОВА.