ВИДЕО: Тустуук Виктор Рассадин «Яшар Догу» турнирга үһүс миэстэни ылла

Ааспыт өрөбүллэргэ, олунньу 26-27 күннэригэр, Турцияҕа «Яшар Догу» норуоттар икки ардыларынааҕы көҥүл тустууга турнир буолла. Манна биир дойдулаахпыт быйылгы Ярыгин турнирын кыайыылааҕа Виктор Рассадин Арассыыйа сүүмэрдэммит хамаандатыгар киирэн ситиһиилээхтик кыттан, боруонса мэтээл хаһаайынынан буолла.

70 киилэҕэ боруонса мэтээл иһин киирсиигэ Виктор Рассадин Иран бөҕөһүн Алиакбар Фазлихалилины туше албаһынан кыайда.

Санатан суруйдахха, быйылгы «Яшар Догу» турнирга Саха сириттэн үс тустуук кытынна: Арассыыйаттан Виктор Рассадин 70 киилэҕэ, Румынияттан Николай Охлопков 65 киилэҕэ уонна Австралияттан Георгий Окороков 61 киилэҕэ.

СИА хаартыската.