Соторутааҕыта батсаап ситимигэр вахтаҕа үлэлии тиийбит саха уолаттарын видеота киэҥник тарҕаммыта. Сытыы сирэйдээх-харахтаах икки уол сахалары бырамыысалыннаска чаҕыйбакка үлэлии кэлэллэригэр ыҥырбыттара. Олортон бу видеону устубут, Навахту14 бырайыак нөҥүө Нерюнгригэ «Колмар” тэрилтэҕэ үлэлии сылдьар Андрей Васильевтыын кэпсэттим.
— Мин Уус Алдан улууһун Суотту нэһилиэгиттэн төрүттээхпин. Уус Алдан Мындаабатааҕы успуорт-оскуолатын 2004 сыллаахха бүтэрбитим. Мин бастакы видеобун тохсунньуга таһаарбытым. Онно саҥа үлэлии тиийээт бастакы симиэнэ кэннэ тута устубутум. Видеобын тыаҕа үлэтэ-хамнаһа суох эбэтэр куоракка, киин сирдэргэ ускул-тэскил сылдьар ыччакка анаан таһаарбытым. Онуоха Интэриниэккэ баар хобу-сибир тарҕатар «дьыбаан буойуннара» биһигини тостон төттөрү кэлиэххит диэбиттэрэ. Ол эрээри биһиги этэҥҥэ үлэлии сылдьабыт. «Колмарга» уопсайа биэс шахта баар. Олортон мин “Восточная денисовский” диэн шахтаҕа үлэлии сылдьабын. Хамнаспыт үрдүк, олорор усулуобуйа барыта баар. Биһиги, сахалар манна шахтаҕа үлэҕэ былдьаһыкка сылдьабыт. Үлэбитин 100% толоробут.
Андрей Васильевтыын вахтанан үлэ туһунан сиһилии кэпсэтиибитин “Саха сирэ” хаһыат кэлэр нүөмэригэр ааҕаарыҥ. Кини манна олорор, үлэлиир усулуобуйа, эрэсиим, хамнас, саха ыччатын туһунан тус санаатын үллэһиннэ.
Ульяна ЗАХАРОВА.
Андрей Васильев тус архыыбыттан хаартыскалар туһанылыннылар.