Үөһээ Бүлүүгэ олохтоох оҥорон таһаарыы сайдар

Бөлөххө киир:

Ил Дархан э.т. Айсен Николаев кэнники кэмҥэ Үөһээ Бүлүүгэ предпринимательство, олохтоох оҥорон таһаарыы сайдан эрэрин, эдэр дьон аччыгый, орто бизнескэ ылсалларын бэлиэтиир.

Айсен Николаев Үөһээ Бүлүүгэ бастаан предпринимателлэри кытары көрүстэ. Ол курдук, түргэнник тутуллар эбийиэктэргэ туһаныллар тутуу матырыйаалын оҥорон таһаарар кыра собуокка сырытта. Эдэр предприниматель Александр Семенов иһитиннэрбитинэн, билигин сакаас киирэ турарынан, бородууксуйаларын элбэтиэхтэрин баҕараллар. “Оҥорон таһаарыыбытын кэҥэттэн, бородууксуйабытын элбэтиэхпитин баҕарабыт. Сакаас киирэ турар. Билигин улуус үөрэҕин кыһаларыгар аҕыс эбийиэккэ сакаас ылан олоробут”, — диэн этэр.

Салгыы Айсен Сергеевич Нам сэлиэнньэтигэр “Уох” диэн үүт бородууксуйатын оҥорон таһаарар тэрилтэҕэ сырытта. Тэрилтэ энергетическэй утахтарын нэһилиэнньэ хамаҕатык ылар. Салайааччы Александр Иванов бу бородууксуйатын өссө хаҥатан чугас сытар улуустарга тарҕатар санаалаах.

Ону таһынан Намҥа Ил Дархан эбээһинэһин толорооччу П.Н.Тобуроков аатынан саҥа тутуллубут оскуолаҕа сылдьан учууталлары, үөрэнээччилэри кытары көрүстэ. Санатан эттэххэ, бу оскуола быйыл олунньуга үлэҕэ киирбитэ. Быйылгы үөрэх дьылыгар 246 үөрэнээччи киирдэ. Бу оскуола СӨ үөрэҕин уонна наукатын министиэристибэтин тирэх пууна буолар.
“Үөһээ Бүлүү – Бүлүү бөлөх улуустар социальнай-экономическай сайдыыларыгар биир тутаах миэстэни ылар. Манна улахан промышленнай оҥорон таһаарыы суох буолан, олохтоох былаас тыа хаһаайыстыбатын, олохтоох оҥорон таһаарыыны, социальнай инфраструктураны сайыннарарга ылсаллар. Ити барыта нэһилиэнньэ олоҕо сайдарыгар төһүү күүс буолар. Билигин эдэрдэр орто, аччыгый бизнескэ киирэн, олохтоох оҥорон таһаарыынан дьарыктанан, улуустарыгар нолуок киллэрэн, үлэ миэстэтин арыйан төрөөбүт дойдуларын сайыннара сылдьалларыттан үөрэбин”, — диэн иһитиннэрэр Айсен Сергеевич командировкатын түмүгэр.

Аграфена КУЗЬМИНА, edersaas.ru

+1
0
+1
0
+1
0
+1
0
+1
0
+1
0
+1
0