ВФЛА Токио олимпиадатыгар чэпчэки атлетикаҕа сүүмэрдээһин киритиэрийдэрин бигэргэттэ
Кулун тутар 18 күнүгэр World Athletics сэбиэтэ Арассыыйа спортсменнарыгар Аан дойдутааҕы күрэхтэһиилэргэ кыттар бырааптарын төнүннэрбитэ. Аан дойдутааҕы күрэхтэһиилэргэ кыттар наадатыгар спортсмен нейтральнай статустаах буолара ирдэниллэр. Хомойуох иһин, национальнай федерация дисквалификацияланан, дойдубут былааҕынан кыттар кыаллыбат.
Бүтүн Арассыыйатааҕы чэпчэки атлетика федерацията (ВФЛА) Токио куоракка ыытыллар Олимпийскай оонньууларга уон спортсмены таларга сүүмэрдээһин бэрээдэгин уонна киритиэрийдэрин бигэргэппитин туһунан ВФЛА пресс-сулууспата иһитиннэрэр. Сүүмэрдээһин испииһэгэ аҕыс пуунтан турар:
1. Япония Токио куоратыгар ыытыллар ХХХI Олимпиадаҕа кыттааччы нейтральнай статустаах буолуохтаах.
2. Япония Токио куоратыгар ыытыллар ХХХI Олимпиадаҕа кыттарга нормативы толорбут буолуохтаах.
3. 2021 с. Арассыыйа чөмпүйэнээтигэр уонна атын Бүтүн Арассыыйатааҕы эбэтэр аан дойдутааҕы таһымнаах күрэхтэһиилэргэ тустаах көрүҥҥэ кыттыбыт буолуохтаах. 2021 с. кыттыбыт күрэхтэһиилэригэр допинг-хонтуруол оҥоһуллубут буолуохтаах, ону тэҥэ дьиссипилиинэлэргэ булгуччу ирдэнэр буоллаҕына, фотофиниш уонна ветромер оҥоһуллубут буолуохтаах.
4. Спортсмен аан дойдутааҕы тиэстиир пуул регистрациятыгар эбэтэр национальнай тиэстиир пуул регистрациятыгар баар буолуохтаах. Аан дойдутааҕы тиэстиир пуул национальнай тиэстиир пуултан таһымнаах буолар.
5. 2021 с. бэс ыйын 27 күнүн ааҕан туран, спортсмен Аан дойдутааҕы World Athletics топ-илииһигэр хаһыс миэстэлээҕэ көрүллэр. Спортсмен бэйэтин кыттыахтаах көрүҥүгэр Аан дойдутааҕы World Athletics топ-илииһигэр төһөнөн үрдүк көрдөрүүлээх даҕаны, оччонон ордук. (Өскөтүн бэс ыйын 28 күнүгэр сарсыарда 9:00 ч туругунан Арассыыйа спортсменнара официальнай күрэхтэһиилэргэ көрдөрбүт түмүктэрэ (күрэхтэһиилэр 2.3 п. билиҥҥи балаһыанньаҕа сөп түбэһиэхтээхтэр) World Athletics топ- илиистэригэр бэлиэтэммэтэх буоллахтарына, Үлэ бөлөҕө топ-илиистэргэ түмүктэри киллэрэн баран көрүөҕэ. Онуоха хас биирдии дисциплинаҕа дойдубутуттан үстэн элбэҕэ суох спортсмен түмүгэ учуоттаныаҕа.)
6. Спортсмен Арассыыйа антидопинговай агентствотыгар допинг утары онлайн куурустары барыахтаах уонна ону туоһулуур 2021 сылга бэриллибит сэртипикээтэ баар буолуохтаах.
7. Спортсмен күрэхтэһиигэ киирэр көҥүлэ дириҥэтиллэн оҥоһуллубут анал мэдиссиинэ чинчийиитин түмүгүнэн бигэргэммит буолуохтаах.
8. Испииһэк састаабын оҥоруу кэмигэр спортсмен антидопинг быраабылатын кэспитин туһунан аһаҕас дьыала эбэтэр силиэстийэ суох буолуохтаах.
Санатан эттэххэ, Япония Токио куоратыгар ыытыллар ХХХI Олимпиада от ыйын 23 күнүттэн атырдьах ыйын 8 күнүгэр диэри ыытыллыаҕа.
Надежда Ильина,»Саха сирэ» хаһыат, edersaas.ru