«Дыгын оонньууларын» күрэхтэһиитэ иккис күнэ ыытылла турар. Бүгүҥҥү күн үһүс түһүмэҕэр — хапсаҕайга Ньурба боотура Владимир Федоров тэҥнээҕин булбата.
Хапсаҕайга үс бастакы миэстэ маннык буолла:
1 миэстэ — Владимир Федоров (Ньурба);
2 миэстэ — Алексей Уваровскай (Кэбээйи);
3 миэстэ — Леонид Филиппов (Амма).
Салгыы:
Хапсаҕай түһүмэҕин туһүнан «Дыгын оонньууларын» элбэх төгүллээх чөмпүйүөнэ Иван Белолюбскай санаатын үллэһиннэ:
— Бу көрүҥ кэнниттэн оонньууларга түөрт сыл устата хотторор диэни билбэтэх Егор Филиппов балаһыанньата уустугурда. Ол оннугар өр кэмнэргэ сыраласпыт Леонид Филиппов күнэ тахсыах курдук буолла. Хапсаҕайга икки кыра ыйааһыннаах уолаттар иккис-үһүс буоллулар — Алексей Уваровскай уонна Леонид Филиппов. Ол эрээри, Леняны кыра ыйааһыннаах диэбэккин, ортолорго киирсэр. Бастаан турнирга кыттарыгар 70 киилэни кыайбат ыйааһыннаах этэ. Леонид Филипповка «Дыгын оонньууларын» кыайыылааҕа буоларыгар биир хардыы хаалла.
Иннокентий Колесов үс иһигэр эмиэ киирсиэн сөп.