Вьетнамтан кэлбит кыыс ОРВИ-нан ыалдьа сылдьар сибикилээх буолан, Нерюнгри куорат оройуоннааҕы балыыһатын инфекционнай салаатыгар киирдэ. Быһа холоон, билигин өрөспүүбүлүкэҕэ биир тыһыынча кэриҥэ киһини быраастар кэтээн көрөллөр.
Дьокуускай куоракка олоҕу-дьаһаҕы хааччыйар, хас биирдии дьиэҕэ уот, итии-тымныы уу, сылаас баар буоларын туһугар эппиэттиир үлэһиттэр харантыын кэмигэр үлэлии сылдьаллар. «Теплоэнергия» АУо кэлэктиибэ олохтоох нэһилиэнньэ кутталлаах дьаҥҥа сыстыбатын туһугар дьиэттэн тахсыбакка олорор эрэсиими тутуһарга ыҥырда. Ону сэргэ, Суһал көмө үрүҥ халааттаах аанньаллара эмиэ: «Биһиги эһиги тускутугар үлэбитигэр таҕыстыбыт, эһиги биһиги туспутугар дьиэҕитигэр хаалыҥ», — диэн былакааттаах хаартыскаҕа түстүлэр.
Хаартыска iz.ru
Марианна Тыртыкова, «Саха сирэ» хаһыат, edersaas.ru