Доруобуйа Уопсастыба

Вьетнамҥа коронавирус саҥа көрүҥүн буллулар

Вьетнам учуонайдара коронавирус саҥа көрүҥүн – британскай уонна индийскэй штаммнар булкуспут гибридтэрин буллулар. Бу вирус киһиттэн киһиэхэ ордук түргэнник бэриллэринэн уратылаах.

Доруобуйа харыстабылын миниистирэ Нгуен Тхань Лонг этэринэн, Бакзянг уонна Бакнинь диэн хотугу провинцияларга коронавирус “төрдүс долгуна” маассабайдык тарҕаммыт.

Доруобуйа аан дойдутааҕы тэрилтэтин (ВОЗ) “ковид-19” ыарыыга салайааччыта Мария Ван Керхове эппитинэн, Вьетнамҥа көстүбүт саҥа вирус үчүгэйдик чинчиллэ илик. Вьетнамҥа B.1.617.2 диэн индийскэй штамм дьүһүн кубулуйбутун булбуттар. Олус түргэнник тарҕанар буолан, кылгас кэмҥэ дойду араас муннуктарыгар тарҕана охсубут. Министиэристибэ иһитиннэрбитинэн, Вьетнамҥа 10 мөлүйүөн устуука COVAX, 20 мөлүйүөн устуука Pfizer (PFE.N) уонна 40 мөлүйүөн устуука Sputnik V быһыылары атыылаһар былааннаах.

Бу тэрилтэ “ковид” барыта 4 дьүһүн кубулуйуутун булан турар: Индияҕа, Британияҕа, Соҕуруу Африкаҕа уонна Бразилияҕа.

 

Ангелина Васильева, “Саха сирэ” хаһыат, edersaas.ru

Хаартыска: sakha.gov.ru

0
0