Коронавирус эпидиэмийэтэ өрө туран, бу күннэргэ бары дьиэбитигэр олоробут.
edersaas.ru
Горнай улууһун Орто Сурт нэһилиэгин олохтооҕо, түөрт уол оҕолоох Алексей Вензель дьиэ кэргэнин кытта дьиэҕэ олорор кэмигэр бэрт интэриэһинэй дьарыгы тобулла.
— Мин кулуупка аккомпаниаторынан үлэлиир буолан, дьиэ кэргэн ансаамбылын икки сыллааҕыта тэрийбитим. Түгэн булан бары мустан дьарыктанар кыахпыт суоҕа. Оттон билигин, солотуйбучча, оҕолорбун музыкальнай инструменнарга оонньуурга үөрэтэбин. Баҕа санаам — үчүгэй тыастаах-уустаах, муусукаҕа бэйэ буочардаах дьиэ кэргэн ансаамбыла буолуохпутун баҕарабын. Ол туолара элбэх дьарыктан тутулуктаах. Билигин дьиэбитигэр олорон төһө баҕарар оонньуубут, дьарыктанабыт. Киэһэ аайы 18 ч. бары мустан, биир-икки чааһы дьарыкка аныыбыт.
Ол курдук, улахан уол Толик «ударнайга» охсорго үөрэнэр. Орто уолу Артуру 6 сааһыттан гитараҕа оонньуурга үөрэппитим. Билигин ритм гитараҕа боростуой аккордары үчүгэйдик тутан оонньуур. Ийэбит Ксения Анатольевна бас гитараҕа үөрэнэр. Кыра игирэ уолаттар тыыннаах доҕуһуол музыкатын интириэһиргииллэр. Дьарык кэмигэр олус чуумпуран, болҕомтолоохтук туран истэллэр. Бэйэлэрэ талбыт инструменнарын талкыйаллар.
Билигин Николай Сибиряков тылыгар уонна матыыбыгар «Ньургуһуннары» үөрэтэбит. Онтон Виктор Цой репертуарыттан «Кукушка» диэн ырыаны үөрэтиэхпит.
… Ити курдук, дьиэҕэ олорор иллэҥ кэми Вензеллэр дьиэ кэргэн бэрт туһалаахтык атаараллар.
Елена ПОТОЦКАЯ, «Саха сирэ» хаһыат, edersaas.ru