Сүрүн Уопсастыба

Великий Устюг куораттан кэлбит Тымныы Оҕонньор сахалыы саҥарда!

Бу сарсыарда Култуура уонна сынньалаҥ пааркатыгар Чысхаан уонна Тымныы Оҕонньор көрсүһүүлэрэ буолла.

edersaas.ru

Чысхаан Тымныы Полюһуттан Өймөкөөнтөн бэйэтин Резиденциятыттан —  Эбэ Хайатын хаспаҕыттан Тымныы символын хостоон таһааран, Дьокуускайга аҕалла. Тимир көлө салааскаҕа олорон,  кинини доҕоро Тымныы Оҕонньор күүтэн аҕай турдаҕына, оруобуна аттыгар баар буола түстэ.

Тымныы Оҕонньор мустубут дьону сахалыы саҥаран соһутта! Кини бастаан нууччалыы дорооболосто. Онуоха кини үөрэнэн хаалбыт үөрүүлээх хаһыыта иһиллибэтэҕиттэн: «Чысхаан, доҕоор, дьоҥҥун, оҕолоргун аһара тымнытан кэбиспиккин дуу?» — диэт: «Дорообо, Саха сирэ!» — диэн айхаллаата. Дьэ, онно күргүөмүнэн: «Дорообо!!!» — диэн үөрүүлээх харда иһиллибэтэ дуо?!

Оҕо-аймах төрөппүттэрин кытта Саҥа дьыллааҕы дьоруойдары айхаллыы көрүстүлэр. Бүгүн олус тымныйбыт. Ону аахсыбакка, элбэх киһи мустубут.

РФ Култууратын министиэристибэтэ тэрийиитин сыл аайы Саҥа дьыл киин куората быһаарыллар. Быйыл Рязань куорат талыллыбыта. Кэрэхсэбиллээҕэ баар, Кыһын киин куоратынан талыллыбыттар Дьокуускайга кэлэн, куорат мэриятыттан Тымныы Символын туталлар. Бэҕэһээ Дьокуускайга көтөн кэлбит Рязань куорат Култуура управлениетын салайааччыта Евгения Власова Тымныы Символын илиитигэр ылан, олуһун долгуйда.

— Мин хаһан да маннык тымныыны эппинэн-хааммынан билэ илигим. Саха сирэ, кырдьык, аатырдалларын курдук, тымныы да эбит! Биһиэхэ маннык тымныы суох. Онон мин Тымныы символын илдьэ тиийэн, Саҥа дьыл саҕана Рязаҥҥа дьэ тымныйара буолуо, — диэн бэлиэтээтэ ыраахтан сылдьар ыалдьыт.

Онуоха мустубут дьон»Тымныыбыт эгэ эрэ Арассыыйа үрдүнэн тарҕаннын», — диэн бигэргэтэрдии,  ытыстарын таһына түстүлэр.

Оттон кырачааннар, тоҥоллорун умнан,  Тымныы оҕонньортон уонна Чысхаантан соннук харахтарын араарбакка, тонолоппукка көрөн туран турдулар.

Саамай үөрбүт дьонунан Горнайтан сылдьар Вензеллэр дьиэ кэргэттэрэ буоллулар. Кинилэр Саха сирин бастыҥ ыалларын күрэҕэр кытта кэлбиттэр эбит. Тиэрмэстэрин, өйүөлэрин массыыналарыгар илдьэ сылдьаллар. Буолумуна, бүгүн «кыраам да» сололоро суох. Күннэрэ чааһынан, мүнүүтэнэн барыта былааннаммыт үһү.


Төннөн иһэн  «Мир» телеханаал суруналыыстара Паарка устун:»Көр ити бу чыычаах көттө!» — дэһэ-дэһэ хаамса сылдьалларын түбэһэ көрдүм. «Кэллиэгэлэр, тоҥмоккут дуо?» —  диэн ыйыппыппар:» Таҥаспыт тоҥорбот! Анаан Москва маҕаһыыннарын кэрийэн, анал таҥаһы булан кэлбиппит. Нэһиилэ хамсыы да сылдьар буолларбыт, тоҥмоппут. Салгына сибиэһэйэ сүрдээх, мэктиэтигэр төбөбүт эргийэр. Наһаа үчүгэй дойдуга олорор эбиккит!» — диэтилэр.

Ити курдук, сарсыардааҥы күн Тымныы оҕонньортон уонна Чысхаантан саҕаланна. Аны — «Триумф» киэҥ уораҕайыгар сүүрдүм!

Елена ПОТОЦКАЯ, «Саха сирэ» хаһыат, edersaas.ru

Хаартыскаҕа ааптар түһэриитэ.

 

0
0

Добавить комментарий