Сүрүн Уопсастыба

«Вектор» айбыт коронавирус утары вакцинатын уратыларын туһунан

«Вектор» Новосибирскайдааҕы киин айбыт коронавирус дьаҥын утары вакцината саастаах уонна дьарҕа ыарыылаах дьоҥҥо ордук сөп түбэһэрин туһунан Роспотребнадзор салайааччыта Анна Попова иһитиннэрдэ. Бу туһунан rg.ru саайт суруйар.

Попова бэлиэтииринэн, бу препарат аллергияны үөскэппэт эбит. Вакцинаны номнуо дьоҥҥо уонна кыылларга бэрэбиэркэлээбиттэр. «Синтетическай вакцина буолан, киһи доруобуйатыгар охсуута суох», — диэн Роспотребнадзор салайааччыта быһаарар. Кини аллергиялыыр буолан, номнуо вакцинаны ылбытын, ол кэнниттэн туруга этэҥҥэтин, лабораторнай чинчийиилэр туох даҕаны мөкү өрүттэри булбатахтарын туһунан иһитиннэрдэ.

«Вектор» киин айбыт вакцината «ЭпиВакКорона» диэн ааттаммыт, киин оҥорон таһаарбытын патеннаабыт. Бу Арассыыйаҕа айыллыбыт коронавирус утары иккис вакцина буолар. «Вектор» зоонознай инфекциятын отделын салайааччы Александр Рыжиков этэринэн, бу вакцина аччаабыта сыл аҥаара киһиэхэ иммунитеты биэрэр эбит. Онон биирдэ эрэ буолбакка, хаста даҕаны вакциналаныахха сөп.

Препарат балаҕан ыйын бүтүүтэ икки түһүмэхтээх клиническэй чинчийиилэри ааспыт. Эми регистрациялаан баран чинчийии үһүс түһүмэҕэр киириэхтэр. Манна 60 сааһын туолбут баҕалаах дьон кыттыахтаахтар. Былаан быһыытынан, вакцина бастакы баартыйатын сэтинньигэ таһаарыахтаахтар.

edersaas.ru

0
0
Telegram @edersaas20

Добавить комментарий