Саха АССР тэриллибитэ 100 сылын көрсө «Россия 24» телеханаал эпииригэр «Век Якутии» диэн документальнай киинэ көстүөҕэ.
Киинэни биллэр телесуруналыыс Алексей Михалев оҥорбута. Кини бөлөҕүн кытта бу сыл кулун тутарыгар өрөспүүбүлүкэҕэ кэлэн үлэлээбитэ. Киинэҕэ Саха сирэ эрэгийиэн быһыытынан уратыта, ситиһиилэрэ, үгэстэрэ көстүөҕэ.
Суруналыыс Саха сиригэр эрдэ кэлэ сылдьыбыт эбит, ол да буоллар манна кэлэр кыах көһүннэҕин аайы олус үөрэрин этэр. «Саха сиригэр олорор дьон олус эрэллээхтэр, кэпсэтинньэҥнэр. 23 сыллааҕыта Тиксиигэ уонна Уус Өлөөҥҥө улэбинэн кэлэ сылдьыбытым», — диир Алексей Михалев.
«Век Якутии» киинэни «Россия 24» ханаалга муус устар 23-24 күннэригэр хаста даҕаны көрдөрүөхтэрэ: муус устар 23 күнүгэр 14.30 чаастан, муус устар 24 күнүгэр 04.00 уонна 09.30 чаастан (Москва бириэмэтинэн).