Хас да сыллааҕыта Польша сыылынай суруйааччыта, революционер Вацлав Серошевскай “Якуты” диэн бөдөҥ этнографическай уус-уран айымньыта суруйааччы-тылбаасчыт, суруналыыс Семен Горохов тылбааһынан күн сирин көрбүтэ. Салгыы өссө икки кинигэтэ — “Үһүйээннэр” уонна “Саха сирин туһунан кэпсээннэр” сахалыы бэчээттэммиттэрэ. edersaas.ru
Бу күннэргэ эмиэ Семен Горохов тылбааһынан В.Л.Серошевскай “Тыа саҕатыгар” диэн сэһэнэ туспа кинигэнэн таҕыста. Манна ааптар Орто Халымаҕа сыылкаҕа олорбут сылларын, хоту дойду айылҕатын, үтүө санаалаах дьонун тустарынан уустаан-ураннаан сырдатар. Итинэн Польша суруйааччыта Саха сирин туһунан суруйбут айымньылара бүүс-бүтүннүү тылбаастаннылар.
— Сахалар “Сахалары” сахалыы ааҕыах тустаахтар диэн баҕа санаабын ситистим,—диир тылбаасчыт. Саха суруналыыстыкатын аксакала, суруйааччы Семен Николаевич Горохов быйыл ахсынньыга 91 сааһын туолар. Ол да буоллар, ытык кырдьаҕас, билигин да айар үлэнэн утумнаахтык дьарыктанар. Бэйэтин үбүлүөйдээх сылыгар икки уус-уран кинигэтин таһынан, Алтай народнай суруйааччыта Бронтой Бедюров сэһэнин сахалыы тылбаастаан таһаартарбыта. Семен Николаевич билигин “Айхал буоллун, эйиэхэ, Аар Айылҕам!” диэн хоһооннорун кинигэтин бэчээккэ бэлэмнээн, ыалдьар- сылааргыыр да солото суох айа, түбүгүрэ сылдьар.
Сааһырыыга сабырыйтарыма, кырдьыыга кыһарыйтарыма, ситилэргэ ситтэримэ, туппут илиигин ыһыктыма, тэппит атаххын кубулутума , Хоту дойду уола, саха саарына — үс бэлиэлээх Үрүҥ Хоһуун! Биһиги бэтэрээммит, “боломуочунайбыт”, Сэмэн Ньукулаайабыспыт.
Иван Ксенофонтов, edersaas.ru