Ахсынньыга “Саха сирэ” хаһыат 2018 сыл саҥата “Сыл бастыҥ киһитэ” куонкуруһу ыытарын биллэрбитэ. Онно эрэдээксийэ ааҕааччыларыгар, өрөспүүбүлүкэҕэ биллэр-көстөр өҥөлөөх, ситиһиилээх диэн 2017 сыл устата хаһыат бастакы балаһатыгар таһаартаабыт дьонуттан чулууларын талалларын ыҥырбыта. edersaas.ru
Тохсунньу 17-тэн 22 күнүгэр диэри www.edersaas.ru сайт нөҥүө ыытыллыбыт куонкуруска дьоммут-сэргэбит көхтөөхтүк кытынна. Куонкурус түмүгүнэн, түөрт уон киһиттэн саамай элбэх — 3203 куолаһы ылан тустуук, Сурдлимпийскай оонньуулар чөмпүйүөннэрэ Василий Стрекаловскай чулуунан билиниллиннэ.
Уон бастакы ахсааныгар киирдилэр:
- Василий Стрекаловскай – 3203
- Айыллаана Степанова – 2630
- Федор Мартынов – 1947
- Захар Никитин – 1920
- Лидия Шамаева – 1585
- Прокопий Дьячковскай – 1234
- Геннадий Семенов – 1020
- Василий Пак – 1012
- Леонид Спиридонов – 843
- Айыллаан Винокуров – 595
Василий Стрекаловскай 1989 сыллаахха Уус Алдаҥҥа күн сирин көрбүтэ. Кыра сааһыттан тустуунан үлүһүйбүтэ, көбүөргэ бастакы хардыыларын Нерюнгрига тириэньэр Ким Колодезников салалтатынан оҥорбута. Дьаныардаах дьарыгынан истэллэринэн инбэлииттэр ортолоругар Арассыыйа чөмпүйүөнэ, хас да төгүллээх призера буолбута. Көҥүл тустууга дойду сүүмэрдэммит хамаандатын чилиэнэ. 2012 сыллаахха аан дойду чөмпүйэнээтигэр сэттис буолбута.
Көҥүл тустууга Арассыыйа спордун маастара Василий билигин Спорт үрдүкү маастарыстыбатын оскуолатыгар инструктор-спортсменынан үлэлиир.
Бары билэргит курдук, РФ үтүөлээх тириэньэрэ Василий Стручков иитиллээччитин “сулустаах чааһа” былырыын сайын, от 18 – 30 күннэригэр, Турция Самсун куоратыгар ыытыллыбыт Сурдлимпийскай оонньууларга чаҕылыйа умайбыта. Онно Василий Арассыыйа сүүмэрдэммит хамаандатыттан тустан 70 киилэҕэ диэри ыйааһыҥҥа түмүк хапсыһыыга Иран бөҕөһүн Хосейн Дерикванды кылбардык хотон кыһыл көмүс мэтээли ылары ситиспитэ.
Саха Өрөспүүбүлүкэтин Ил Дархана Егор Борисов Ыйааҕынан, спорт сайдыытыгар үрдүк ситиһиилэрин, олимпийскай хамсааһын идиэйэлэрин пропагандалааһын уонна үүнэр көлүөнэни иитиигэ тус улахан кылаатын иһин Сурдлимпиада чөмпүйүөнэ Василий Стрекаловскай Саха Өрөспүүбүлүкэтин үрдүкү наҕараадатынан – “Хотугу сулус” уордьанынан наҕараадаламмыта.
2017 сыл түмүгүнэн Василий Стрекаловскай спорт адаптивнай көрүҥнэригэр өрөспүүбүлүкэ чулуу спортсменынан ааттаммыта.
Роман Попов, «Саха сирэ» хаһыат, edersaas.ru