Василий Плотников: «Хара нэһилиэнньэтин 60-ча %-на быыбарга кыттыа дии саныыбын»

Мэҥэ Хаҥалас Хара нэһилиэгин баһылыгын солбуйааччы Василий Плотников от ыйын 1 күнүгэр буолаары турар Төрүт Сокуоҥҥа киирэр уларытыылары куоластыыр быыбарга нэһилиэк бэлэмин туһунан кэпсээтэ:

— Нэһилиэкпитигэр испииһэккэ киирбитинэн 913 быыбардааччы баар. Эбии 6 киһи манна быыбардыыбыт диэн сайабылыанньа биэрдэ. Билигин 285 нүөмэрдээх быыбардыыр учаастакпытыгар дьон сыстыганнаах ыарыыга сутуллубатын туһугар бэлэмнэнии үлэтэ бара турар.

Быыбарга үлэлиир дьоҥҥо видео-сибээс нөҥүө бэйэни харыстаныыга уонна куттала суох усулуобуйаны оҥорууга сэминээр ыытыллыбыта. Хас биирдии быыбардааччыга мааска, бэрчээкки, уруучука бэриллэр. Кэтээн көрөөччүлэр бааллар. Көмөлөһүөн баҕалаах үс волонтер үлэлииргэ бэлэмнэр.

Дьиэҕэ куоластааһын эмиэ тэриллиэҕэ. Билиҥҥи туругунан дьиэҕэ 85 быыбардааччы куоластыан баҕарар.
Нэһилиэнньэ быыбарга көхтөөхтүк кыттыа дии саныыбыт.

Ньургуйаана Иванова, edersaas.ru