Бүгүн, ыам ыйын 18 күнүгэр, Саха сирин уһулуччулаах бэлитиичэскэй уонна уопсастыбаннай диэйэтэлэ Василий Никифоров-Күлүмнүүр төрөөбүтэ 155 сыла.
Бу долгутуулаах ураты күнүнэн СӨ Ил Дархана Айсен Николаев бар дьоҥҥо туһаайан маннык эттэ.
«Убаастабыллаах сахам дьоно!
Саха өрөспүүбүлүкэтин дьаһалтатын уонна тус бэйэм ааппыттан биллиилээх уопсастыбаннай-бэлитиичэскэй диэйэтэл, саха литературатын төрүттээччилэртэн биирдэстэрэ, национальнай тыйаатыр уонна бэчээт эйгэтигэр төһүү кылааты киллэрбит учуонай, суруйааччы, сырдатааччы Василий Никифоров — Күлүмнүүр төрөөбүтэ 155 сыллаах үбүлүөйүнэн эҕэрдэлиибин!
Саха норуотун чулуу уола Василий Никифоров — Күлүмнүүр аата 60 сыл кэнниттэн биирдэ ырааһырбыта, чөлүгэр түспүтэ, үйэтитиллибитэ.
СӨ бастакы бэрэсэдьиэнэ Михаил Николаев үтүө өҥөтүн бэлиэтиэхпин баҕарабын. Ону сэргэ, Күлүмнүүр аатын үйэтитиигэ, чөлүгэр түһэриигэ чинчийээччи Ираида Клиорина, Иван Федосеев — Доосо уонна Ил Түмэн бэрэссэдээтэлин бастакы солбуйааччы Александр Жирков сүҥкэн өҥөлөөхтөр. Саха сирин уобалаһын бастакы салайааччы В.В.Никифоров эҥкилэ суох киһи этэ. «Сахалар сойуустара» диэн бэлитиичэскэй хамсааһыны төрүттээбит, өрөспүүбүлүкэ уопсастыбаннай-бэлитиичэскэй сайдыытыгар сүҥкэн үтүөнү оҥорбут ытык киһи. Кини сүрүн соруктары норуот үөрэҕириитигэр, мэдиссиинэ, аграрнай култуура сайдыытыгар көрөрө. Сахалыы тылынан суруллубут «Манчаары»пьеса ааптара. Сахалыы бастакы тыллаах хаһыаты, сурунаалы төрүттээччи уонна тэрийээччи этэ. Төрөөбүт кыраайын устуоруйатын үөрэтиигэ уонна саха норуота олоҕун-дьаһаҕын Сибиряковскай научнай чинчийии иһинэн үөрэппитэ.»
Саха сирин уһулуччулаах бэлитиичэскэй уопсастыбаннай диэйэтэлэ Василий Васильевич Никифоров-Күлүмнүүр төрөөбүтэ 155 сылынан, кини сырдык аатыгар сүгүрүйэн, пааматынньыгар сибэкки дьөрбөтүн ууруу сиэрэ-туома ыытылынна.
Ульяна Захарова.
Мария Васильева (СИА) хаартыскаларга түһэриилэрэ