2022 сыл олунньу 24 күнүгэр дойду бэрэсидьиэнэ Владимир Путин бирикээһинэн Украинаҕа анал байыаннай эппэрээссийэ саҕаламмыта.
Бирикээс тахсыбытын кэнниттэн, Украинаҕа бэйэлэрин баҕаларынан барар дьон, ону тэҥэ аармыйаҕа эбэтэр хантараагынан сулууспалыы сылдьар уолаттар байыаннай эпэрээссийэҕэ барыылара саҕаламмыта. Үгүс киһи дойдутун чиэһин көмүскүү, ытык иэһин толоро Украинаҕа күн бүгүҥҥэ диэри бара турар.
Атырдьах ыйын 9 күнүгэр Үөһээ Бүлүү Мэйик нэһилиэгиттэн Василий Иванов Украинаттан этэҥҥэ дойдутугар эргиллэн кэллэ.
Василий Иванову Үөһээ Бүлүү сэлиэнньэтин дьаһалтатын аактабай саалатыгар уруйдаан-айхаллаан көрүстүлэр. Үөһээ Бүлүү сэлиэнньэтин дьаһалтатын, баһылыгын аатыттан Василий Ивановка өйдөбүнньүк бэлэхтэри туттардылар, эҕэрдэ, махтал тыллары анаатылар.
Уол бэйэтэ 2001 сыллаах төрүөх, Мэйик нэһилиэгиттэн сылдьар. Кини Украинаҕа сылдьыбытын туһунан кылгастык маннык кэпсээтэ: «Украинаҕа хантараагынан уопсайа 4 ый буолан кэллим, танковай батальоҥҥа сулууспалаабытым. Биһигини Донецкай өрөспүүбүлүкэҕэ бастаан бырахпыттара, Макеевка диэн дэриэбинэ аттыгар 2 ый сылдьыбыппыт. Онтон Луганскай оройуоҥҥа ыыппыттара. Ас-үөл наһаа элбэх буолбатах этэ, кэмчилиир этибит. Саха сириттэн 2 уолу көрсүбүтүм».
Василий Иванов аармыйаҕа биэрбит андаҕарын толорон, барарга быһаарыммытын туһунан этэр.
“… Дьиэбэр этэҥҥэ эргиллэн кэлбиппиттэн олус үөрэбин», — диэтэ.
Василий Иванов байыаннай эпэрээссийэҕэ кыттыбытын иһин чэпчэтии көрүллэн, Хотугулуу-Илиҥҥи федеральнай университ автодорожнай факультетыгар үрдүк үөрэххэ киирдэ.
«Саха сирэ», edersaas.ru Ангелина Герасимова