Василий Егоров хамаандаҕа бастыҥ буоларын Грознайга хат дакаастыан наада
Германия Гамбург куоратыгар ыытыллар боксаҕа аан дойду чөмпүйэнээтигэр Арассыыйа сүүмэрдэммит хамаандатыттан кыттар Василий Егоровпыт финал чиэппэригэр казах боксеругар Жомарт Ержаҥҥа хотторон, күрэхтэһииттэн туораабыта. Онон салгыы кини Грознай куоракка ыытыллар Арассыыйа чөмпүйэнээтигэр ыйааһыныгар бастакы нүөмэр буоларын дакаастыан наада.
Бу күөн көрсүһүүгэ Василий, өрүү буоларыныы, кимиилээхтик киирсибитэ. Утарылаһааччытын үөс батааска биэрбэккэ түргэн таба охсууларынан чаҕыппыта. Арай иккис түһүмэххэ аҕырымнаан ылбыт курдугун иһин, бастакыга, үһүскэ Василий утарылаһааччытыттан чорбойоро харахха быраҕыллара. Ол да иһин буолуо, киирсии түмүктэммитигэр судьуйалар 5:0 ахсаанынан кыайыыны Жомарка биэрбиттэрин үгүс киһи соһуйа истибитэ. Бэл казах боксера, судьуйа кини илиитин көтөхпүтүгэр, өйдөөбөтөхтүү туттубута.
Күрэхтэһии иннинэ Арассыыйа боксаҕа сүүмэрдэммит хамаандатын кылаабынай тириэньэрэ Эдуард Кравцов аан дойду чөмпүйэнээтигэр миэстэлэспиттэр эрэ дойдуга бастыыр иһин күрэхтэһииттэн босхолонуохтарын туһунан иһитиннэрэн турар.
“Аан дойду призердара эрэ Арассыыйа чөмпүйэнээтиттэн босхолонуохтара. Оттон атыттар ыйааһыннарыгар бастакы нүөмэр буолалларын хаттаан дакаастыахтарын наада буолуо. Дойдуга бастыыр иһин күрэхтэһии кэскиллээх эдэр боксердары, саҥа ааттары арыйыа диэн эрэнэбит”, — диэбитэ кини.
Санатар буоллахха, Арассыыйа быйылгы чөмпүйэнээтэ Грознай куоракка балаҕан ыйын 30 – алтынньы 9 күннэригэр буолуоҕа.
Роман Попов, “Саха сирэ” хаһыат, edersaas.ru