Германия Гамбург куоратыгар ыытыллыбыт боксаҕа аан дойду чөмпүйэнээтиттэн Арассыыйа сүүмэрдэммит хамаандата тоҕус ыйааһыҥҥа кыттан, икки эрэ мэтээллээх эргилиннэ: биир үрүҥ көмүс (Евгений Тищенко, 91 кг) уонна биир боруонса (Тамир Галанов, 52 кг). edersaas.ru
Бары билэргит курдук, Гамбурга 49 киилэҕэ диэри ыйааһыҥҥа киирсибит биир дойдулаахпыт Василий Егоров финал чиэппэригэр казах боксеругар хотторон, күрэхтэһииттэн туораабыта.
Күрэхтэһии иннинэ Арассыыйа боксаҕа сүүмэрдэммит хамаандатын кылаабынай тириэньэрэ Эдуард Кравцов: “Аан дойду призердара эрэ Арассыыйа чөмпүйэнээтиттэн босхолонуохтара. Оттон атыттар ыйааһыннарыгар бастакы нүөмэр буолалларын хаттаан дакаастыахтарын наада буолуо. Дойдуга бастыыр иһин күрэхтэһии кэскиллээх эдэр боксердары, саҥа ааттары арыйыа диэн эрэнэбит”, — диэн иһитиннэрэн турар.
Ааспыт бэнидиэнньиккэ Дьокуускайга көтөн кэлбит Василий Егоров суруналыыстарга Эдуард Кравцов кинини бу ый бүтүүтэ Грознайга ыытыллар Арассыыйа чөмпүйэнээтиттэн босхолообутун туһунан иһитиннэрдэ, онон дойдутугар тахсан чугас дьонун ортотугар сынньаныаҕын, бултуоҕун, балыктыаҕын, ол кэнниттэн, сэтинньиттэн саҥалыы күүһүнэн дьарыгын саҕалыаҕын эттэ.
Роман Попов, «Саха сирэ» хаһыат, edersaas.ru