Сарсын, балаҕан ыйын 14 күнүгэр, киэһэ 19.00 чаас кэнниттэн Василий Егоров Екатеринбург куоракка ыытылла турар аан дойдутааҕы чөмпүйэнээккэ кыттыытын саҕалыаҕа.
Бэҕэһээ киэһэ кини утарсааччытын аатын билбитэ. Эквадортан сылдьар Луис Дельгадо тэҥ киирсиигэ 3:2 ахсаанынан Тошо Касивасакины (Япония) кыайбыта уонна финал 1/16 түһүмэҕэр биһиги уолбутун кытта киирсэр буолбута.
Луис Дельгадо туһунан туох биллэрий? Кини 2000 сыллаах төрүөх. Былырыын Венгрияҕа ыытыллыбыт ыччаттар аан дойдутааҕы түһүлгэригэр бастакы киирсиитигэр Карим Серкебаев диэн Казахстан боксеругар 1:4 ахсаанынан хотторбута.
Бу саас ыытыллыбыт Панамериканскай оонньуулар сүүмэрдиир күрэхтэһиилэригэр Луис Дельгадо финал ¼ түһүмэҕэр Оскар Коллацо диэн Пуэрто-Рико боксеругар 0:5 ахсаанынан кыайтарбыта. Бэлиэтээн эттэххэ, кини бу күрэхтэһиигэ 49 киилэҕэ диэри ыйааһыҥҥа кыттыыны ылбыта.
Аан дойду күрэхтэһиитигэр Эквадор хамаандатын Куба тириэньэрдэрэ эрчийэн бэлэмнээн аҕаллылар.