Василий Егоров: «Санаабын түһэрбэппин, өссө дьаныардаахтык дьарыктаныам»

Ааптар: 
Бөлөххө киир:

Бүгүн, балаҕан ыйын 7 күнүгэр, буоксаҕа Арассыыйа чөмпүйэнээтин түмүктэринэн пресс-кэмпириэнсийэ Дьокуускайга «Өрөгөй» успуорка бэлэмнэнии киинигэр ыытылынна.

Бу ый 4 күнүгэр Кемеровоҕа буолбут дойду чөмпүйэнээтигэр Саха сирин боксердара ситиһиилээхтик кытыннылар. Өрөспүүбүлүкэ аатыттан 11 спортсмен күрэхтэстэ, кинилэртэн икки зачетунан Михаил Прокопьев — 48 киилэҕэ Краснодартан, Назар Андреев — 75 киилэҕэ, Борис Сидоров — 48 киилэҕэ Москваттан, Василий Егоров — 51 киилэҕэ Московскай уобаластан, Евгений Мартынов — 51 киилэҕэ Санкт-Петербургтан.

Финал 1/8 48 уонна 51 киилэҕэ ыйааһыннарга түөрт уолбут ааспыта. Онтон финал 1/4 Евгений Мартынов уонна Василий Егоров ааһаннар, Евгений боруонса, Василий үрүҥ көмүс призердар буоллулар.

Пресс-кэмпириэнсийэҕэ СӨ Успуорка уонна физическэй култуураҕа миниистирэ Иннокентий Григорьев, буоска федерациятын бэрэсидьиэнэ Петр Алексеев, буоксаҕа өрөспүүбүлүкэ сүрүн тириэньэрэ Владимир Павлов, боксер, успуорт үтүөлээх маастара Василий Егоров, старшай тириэньэр Николай Егоров кыттыыны ыллылар. Кинилэр күрэхтэһии кэнниттэн санааларын үллэһиннилэр, ситиһиилээхтэри эҕэрдэлээтилэр.

«Бу чөмпүйэнээккэ өй-санаа да, эт-сиин да өттүнэн бэлэмнээх этим. Биллэн турар, кыайыахпын баҕарбытым, ол эрээри кыра тиийбэтэ. Үгүс дьон киирсии түмүгүн сыыһа таһаардылар диир. Мин илиибин өрө көтөхпөтөхтөрө, ол аата сыыстаҕым, ситэ үлэлээбэтэх буоллаҕым. Тактикам сыыһалааҕа буолуо диэн саныыбын. Хотторору эмиэ сатыахха наада. Бу күрэхтэһии миэхэ уопут буолар. Арассыыйа сүүмэрдэммит хамаандатыгар уонча сыл баарбын, ол тухары ханна эрэ кыайбытым, ханна эрэ хотторбутум. Иннибэр өссө да элбэх күрэхтэһиилэр, сбордар күүтэллэр. Кэлэр сыллааҕы чөмпүйэнээт быһаарыылаах буолуоҕа, онно өссө кыһаллан бэлэмнэниэм. Санаабын түһэрбэппин, өссө дьаныардаахтык дьарыктаныам», — диэн чөмпүйэнээт үрүҥ көмүс призера Василий Егоров санаатын үллэһиннэ.

Василий Егоров бу өрөбүлгэ Кисловодскайга сбордана көтөр, салгыы Сочига дьарыктаныаҕа. Мантан тириэньэрдэр ыстааптарын быһаарыытынан, аан дойду чөмпүйэнээтигэр кыттар састаап биллиэҕэ.

Айтана Аммосова, edersaas.ru

Ааптар хаартыската.

+1
0
+1
0
+1
0
+1
0
+1
0
+1
0
+1
0