Арассыыйа чөмпүйэнээтэ. Финал. Василий Егоров утарсааччыта төбөтүнэн түһэн, Вася сүүһүн аҥаара хайа барар. Төбөтө барыта кыа хаан буолбут уолу көрөн, киһи сүрэҕэ «парк» гынар. Быраас хааны тохтотор, былаастыр сыһыарар. Вася бастааҥҥы кимиитин сүтэрбэтэх курдук, сэргэх. Салгыы киирсэллэр. Буоксаттан ыраах да киһи хараҕар, биһиги уолбут элбэхтэ табар курдук. Түмүгү этэллэр: судьуйалар биир санаанан Васяҕа кыайыыны биэрэллэр.
— Вася, бастатан туран, кыайыыгынан эҕэрдэ! Бэлэмнэнииҥ хайдах ааспытай?
— Ааспыттааҥҥы Арассыыйа чөмпүйэнээтигэр иккис буолан баран, тута эһиилги сылбар бэлэмнэнэн барбытым. Кулун тутарга харантыын биллэриллибитин кэнниттэн, түөрт ый устата дьиэбэр дьарыктаммытым. Гарааспар араас спортивнай тэриллэри бэйэм оҥороммун, убайым Николайы уонна тириэньэрим Артур Иннокентьевиһы кытта дьарыктанар этибит. Оннук дьарыктанан, от ыйыгар ыытыллыбыт Арассыыйа Кубогар үс киирсиигэ кыайбытым. Күһүн салгыы Сочига дьарыктаммыппыт. Онно Артур Иннокентьевич ыалдьан, салгыы Кисловодскайга барсыбатаҕа.
— Эн өр сылларга бииргэ үлэлэспит тус тириэньэриҥ, элбэх ситиһиини аҕалбыт аҕаҥ кэриэтэ киһиҥ Артур Иннокентьевич бараахтаабыта…
— Ыараханнык ылыммытым. Куруук аттыгар баар киһиҥ эмискэ суох буолара олус ыарахан эбит. Наар аттыбар баарыгар, сүбэтигэр-аматыгар үөрэнэн хаалбыт эбиппин. Ол эрээри, санаабар Артур Иннокентьевич куруутун баар курдук. Ханна да буолларбын, кинилиин сылдьар курдук сананабын. Оннооҕор бу күрэхтэһиигэ риингэҕэ тахсаары туран, «Артур Иннокентьевич, билигин кыайабыт» диэн испэр санаабытым. Кини миигин үөһэттэн араҥаччылыы сылдьар курдук.
— Күрэхтэһэр ыйааһыҥҥын уларыппытыҥ хайдах эбитий?
— Бу иннинэ буокса саамай чэпчэки ыйааһыныгар – 49 кг киирсэр эбит буоллахпына, бу сырыыга 52 кг таҕыстым. Ол иннинээҕи киирсиилэрбэр миэхэ күүс тиийбэтин өйдөөбүтүм. Оруобуна хамсык кэмигэр, тимирдэринэн дьарыктана, күүспүн хачайдыы сылдьыбытым. Күүс эбэр, ол эрээри, бытаарбат гына сыалланан дьарыктаммытым. 49 кг диэри наһаа элбэҕи түһэрэр этим. Билигин буоллаҕына, сэниэлээхтик киирсэрбин бэлиэтии көрдүм.
— Билиҥҥи тириэньэриҥ кимий?
— Геннадий Геннадиевич Ковалев – Арассыыйа сүүмэрдэммит хамаандатын старшай тириэньэрэ уонна бииргэ төрөөбүт убайым Николай Михайлович. Саҥа тириэньэрбин кытары бэркэ үлэлэһэн, биир тылы булан, бастакы кыайыыбыт кэллэ. Геннадий Геннадиевиһы кытта уруккуттан сүүмэрдэммит хамаанда дьарыктарыгар алтыһар этим. Оттон убайым Николай – мин иккис илиим. Дьарыгым, айаным, аһылыгым барыта кини үрдүнэн барар. Түгэнинэн туһанан, тириэньэрдэрбэр махталбын тиэрдэбин.
— Финалга утарсааччыҥ төбөтүнэн түспүтүгэр, сүүһүҥ хайа барбыта. Онно ыксыы сылдьыбытыҥ дуо?
— Суох. Успуорка маннык түгэннэр син биир баар буолаллар диэн, бэлэмнээхпин. Ыксаамыахха, ыһыллымыахха наада. Бу туһунан психологы кытары сүбэлэһээччибит.
— Уопсайынан, улахан спортсменнар психологы кытары элбэхтик үлэлэһэҕит дуо?
— Биллэн турар. Сүүмэрдэммит хамаандабытыгар Айгуль диэн бэртээхэй психолог үлэлиир. Кинилиин, Арассыыйаҕа иккис буолбутум кэннэ, санаабын-онообун көннөрүммүтүм.
— Салгыы туох былааннар бааллар?
— Аҕыйах күҥҥэ дойдубар кэлэн сынньаныам, күүс-уох ылыам. Онтон дириҥник чинчийэр мэдиссиинискэй хамыыһыйа (углубленный медосмотр) ааһыахтаахпыт. Тохсунньу саҥатыгар Польшаҕа дьарыктыыр-үөрэтэр түмсүүнү барыахтаахпыт. Түгэнинэн туһанан, Ил Дархан Айсен Сергеевичкэ, убайбар Николай Михайловичка, дьиэ кэргэммэр, СӨ успуордун министиэристибэтигэр, Саха сирин буоксаҕа федерациятыгар, Саха сиринээҕи успуорт бэлэмниир киинигэр, Мэҥэ Хаҥалас дьаһалтатыгар, Чурапчытааҕы физическэй култуура уонна успуорт институтугар уонна миэхэ ыалдьыбыт Сахам сирин бар дьонугар барҕа махталбын тиэрдэбин!
Виктория Бястинова, «Саха сирэ» хаһыат, edersaas.ru