Оренбург куоракка боксаҕа Арассыыйа чөмпүйэнээтин финала буолла. 49 киилэҕэ биир дойдулаахпыт Василий Егоров (Саха сирэ) утарсааччытынан Бэлик Галановы (Бурятия) 3:0 ахсаанынан эрэллээхтик кыайда. Рингэҕэ барыта 300-чэкэ боксер тахсан мэтээл иһин көрүстэ. Саха сириттэн, кылаабынай тренерэ Артур Пахомов салалтатынан биэс боксербут: Олимпиада кыттыылааҕа Василий Егоров, Уһук Илин федеральнай уокурук чөмпүйүөнэ Борис Сидоров (иккиэн 49 кг), “Локомотив” спортивнай уопсастыба Бүтүн Россиятааҕы күрэхтэһиитин кыайыылааҕа Егор Евсеев (52 кг), Уһук Илин федеральнай уокурук чөмпүйүөнэ Михаил Парников (56 кг) уонна Россия эдэрдэргэ күрэхтэһиитин кыайыылааҕа Айтал Дьяконов (60 кг) кытынна.
Ханныгын да иһин, саха спорду таптааччылара улахан болҕомтолорун спорт үтүөлээх маастара Василий Егоровка уурдулар. Риотааҕы Олимпиадаҕа хотторуутун кэнниттэн, Василий бэйэтин ыйааһыныгар Россияҕа бастыҥ боксер буоларын өссө төгүл итэҕэтэргэ дьулуспута. Уопсайа, 49 киилэҕэ 25 боксер кытынна. Бастакы эргииргэ Егоров сынньаммыта. Финал 8/1-гэр устудьуоннар Бүтүн Арассыыйатааҕы 5-с сайыҥҥы оонньууларын кыайыылааҕа 22 саастаах Михаил Прокопьевы (Краснодар), салгыы киирсиигэ Андрей Потемкины (Ульяновскай) үчүгэйдик кыайталаабыта.
Бу ыйааһын саамай кэтэһиилээх киирсиитинэн, эрдэттэн күүстээхтэринэн биллибит олимпиец Василий Егоров уонна Арассыыйа былырыыҥҥы чөмпүйүөнэ, Бакуга ыытыллыбыт Европа бастакы оонньууларын кыайыылааҕа Батор Сагалуев (Бурятия) икки ардыларыгар буолуоҕа диэн сэрэйиллибитэ. Кинилэр финалга тахсар иһин киирсиигэ көрсүөхтэрин сөптөөҕө. Бу да сырыыга биһиги боксербут эрдээхтик киирсэн, эмиэ эмиэ инники киирсиилэригэр курдук утарсааччытын Сагалуевы 3:0 ахсаанынан эрэллээхтик кыайа тутта.
Дьэ онон, финал: Василий Егоров – Бэликто Галанов (Москва, Бурятия). Киирсиини интернетинэн быһа көрө олордоххо, Василий сэргэхтик боксаласта. Улахан маастарыстыбалаах буолан, үс рауну барытын үчүгэйдик хонтуруоллаан кииристэ. Тохтобулларга киниэхэ бииргэ төрөөбүт убайа, спорт маастара Николай уонна тус тренерэ Артур Пахомов наадалаах сүбэлэри биэрдилэр. Син эмиэ инники киирсиилэргэ курдук, үһүс рауҥҥа сытыы охсуулары оҥортоото. Онон туораттан көрө олордоххо, туох да мөккүөрэ суох кыайарын кыайда. Итиэннэ билиҥҥи кэмҥэ бэйэтин ыйааһыныгар Россияҕа бастыҥ боксер буоларын итэҕэттэ.
Василий Егоров бу кыайыыта – бу күннэргэ бэлиэтэнээри турар (ахсынньы 2 күнүгэр) Саха сиригэр бокса сайдыбыта 60 сыллаах үбүлүөйүн көрсө дьоһун бэлэҕинэн буолла.
Петр ПАВЛОВ.